Distancimi social është një rregull, por jo ligj, ndaj ka edhe nga ata persona që nuk e shohin të arsyeshme ta zbatojnë.
Megjithëse pjesa më e madhe e popullsisë është ndërgjegjësuar për të zbatuar rregullat dhe për të mbajtur distancën, një pjesë e tyre vazhdojnë të vendosin në rrezik jo vetëm shëndetin e tyre, por edhe të personave që i rrethojnë.
Ata dalin pa maska e doreza në publik, madje i qëndrojnë shumë pranë personave të tjerë të cilët pavarësisht se kanë masa mbrojtëse, sërish shqetësohen për shëndetin e tyre.
Nëse keni qenë në një situatë të tillë, apo mund të ndodheni në të ardhmen, po ju tregojmë disa këshilla si të veproni nga ekspertët e shëndetit.
Kur sheh se dikush po thyen distancimin social, po afrohet më shumë sesa duhet apo bën një veprim tjetër të rrezikshëm për përhapjen e Covid-19, komuniko!
Tregoji personit nga i cili ndihesh i rrezikuar se çfarë të shqetëson, kërkoji me mirësjellje dhe respekt të largohet.
“Të lutem mund të largohesh disa hapa? Dua të sigurohem që po mbroj si veten time, ashtu edhe ty.”
Nëse personi ofendohet nga kërkesa juaj, mos hiqni dorë nga e drejta për t’u mbrojtur! Ata po vendosin shëndetin tënd në rrezik, ndaj është më e mira që mund të bësh.
Gjithashtu, ti mund të mos paraqitesh më në një ambient derisa masat e sigurisë të ndryshojnë.
Shembull: Nëse të shqetëson fakti që punojësit e dyqanit nuk përdorin masa mbrojtëse, komuniko me përgjegjësit.
Zgjidh të shkosh diku tjetër derisa të sigurohesh se vendi për të cilin je ankuar i ka zbatuar masat e mbrojtjes dhe distancimit social.
Nëse nuk rrezikohesh drejtëpërdrejt, por sërish ndihesh i shqetësuar, relaksohu!
Shembull: Nëse shikon fqinjët e tu të kolliten, të kenë kontakte të shumta me njëri-tjetrin dhe të mos përdorin masa mbrojtëse, mos u panikos. Nuk të bën mirë!
Mendo pozitivisht dhe uroji atyre më të mirën. Shpreso që gjendja e tyre do të përmirësohet dhe asgjë e keqe nuk do të ndodhë. Do të ndihesh më mirë nëse e drejton mendjen tënde në të tilla mendime.
Nëse nuk je i sigurt se për ç’arsye dikush po e thyen distancimin social, tregohu i arsyeshëm.
Shembull: Nëse sheh dikë që qëndron në rrugë, në parkun e boshatisur apo diku tjetër, mendo! Ai mund të jetë njeri pa shtëpi dhe kjo është mënyra e tij e distancimit.
Kjo është diçka komplet tjetër nga dikush që shkon në dyqan dhe lëpin ushqimet. Ky i fundit të vendos me të vërtetë në rrezik, por në raste të tjera mendohu më shumë!
Nëse zbaton këto këshilla, izolimi yt do të jetë më i qetë dhe do ta kalosh më mirë këtë situatë. Të paktën përpiqu!
