Ngjarja shokuese e ndodhur në një familje shqiptare në Greqi, tronditi të gjithë opinionin publik, ndërsa policia greke zbuloi të tjera detaje lidhur me të. E gjitha nisi 3 muaj më parë në lagjen “Petroupoli” në Athinë, ku u gjet kufoma e një foshnje të sapolindur brenda një kazani plehrash.
Për këtë ngjarje u arrestuar një 19-vjeçare shqiptare bashkë me të ëmën 54-vjeçare, e cila dha në dëshminë e saj të tjera detaje rrëqethëse.
Ajo kishte mbetur shtatzënë me një djalë, me të cilin kishte 7 muaj që ishte ndarë dhe lajmin e shtatzënisë e kishte kuptuar vonë.
Deri në ditën që e kapën dhimbjet e lindjes, shqiptarja e mbajti të fshehtë shtatzëninë nga nëna dhe vëllai i saj, me të cilët edhe jetonte.
19-vjeçarja e lindi foshnjën në tualetin e shtëpisë së saj, madje edhe i ka dhënë gji dhe më pas i vuri kartopecetat në gojë që të mos dëgjohej e qara e fëmijës. Më vonë i lidhi një kordon rreth grykës dhe e mbyti.
Pas aktit barbar ajo i tregoi të vërtetën nënës dhe së bashku futën foshnjën në një qese plastike, për ta hedhur më pas në koshin e plehrave, ku u gjet nga një lypës.
19-vjeçarja dëshmoi në gjykatë se pas disa ditësh nga krimi i rëndë, kaloi pranë kazanit të mbeturinave dhe vendosi lule në mënyrë që ta falte Zoti për gabimin e bërë.
