Hailee Steinfeld dhe Josh Allen janë bërë prindër për herë të parë, duke ndarë me ndjekësit lajmin e bukur që ka sjellë gëzim të madh në jetën e tyre.
Më pak se një vit pas martesës, aktorja e njohur e Hollywoodit ka konfirmuar përmes një postimi në Instagram se ka sjellë në jetë fëmijën e saj të parë me bashkëshortin, yllin e futbollit amerikan Josh Allen. Çifti ka zgjedhur ta mbajë momentin mjaft intim, duke publikuar vetëm një deklaratë të shkurtër, ku shprehin lumturinë e madhe për ardhjen në jetë të vogëlushes së tyre.
Lajmi është pritur me shumë entuziazëm nga fansat e çiftit, të cilët prej kohësh kanë ndjekur nga afër historinë e tyre të dashurisë. Hailee Steinfeld, e cila njihet për rolet e saj të suksesshme në kinematografi dhe së fundmi për paraqitjen në filmin “Blood & Sinners” përkrah Michael B. Jordan, nuk ka zbuluar ende emrin e vajzës, duke preferuar ta mbajë këtë detaj larg vëmendjes së publikut.
Historia e dashurisë mes Steinfeld dhe Allen nisi në maj të vitit 2023. Në fillim, lidhja e tyre u komentua gjerësisht në mediat rozë, por më pas dyshja vendosi ta bëjë publike romancën edhe në rrjetet sociale, duke konfirmuar se gjithçka mes tyre po bëhej gjithnjë e më serioze.
Vetëm pak kohë më vonë, marrëdhënia e tyre mori një tjetër kthesë të rëndësishme. Në fund të majit 2025, Hailee dhe Josh kurorëzuan dashurinë e tyre me martesë, ndërsa tani kanë hyrë në një kapitull të ri, atë të prindërimit.
Me ardhjen në jetë të fëmijës së parë, çifti duket se po përjeton një nga periudhat më të bukura të jetës së tyre.
