Taksa vala e dytë e Covid-19 po përhapet me shpejtësi, të gjithë po pyesin se kur do jetë gati vaksina anti-Covid, që do i japë fund pandemisë.
“Bild” shkruan se kontrata e Bashkimit Evropian me kompaninë gjermane të bioteknologjisë BioNTech për furnizimin me vaksinën e koronavirusit, e cila përgatitet në bashkëpunim me kompaninë farmaceutike Pfizer, është gati.
Të dy palët përfunduan bisedimet dhe arritën një marrëveshje paraprake në 9 shtator, por kontrata nuk ishte nënshkruar. Negociatat për kushtet e kontratës kanë përfunduar dhe rezultati do të paraqitet nesër, ku pritet të marrë miratimin zyrtar.
“Gjithçka është aty (në kontratë) dhe asgjë nuk mund ta ndalojë atë më” shkruan prestigjozja gjermane, duke shtuar se marrëveshja ka të bëjë me 200,000,000 vaksina dhe një mundësi për 100,000,000 shtesë dhe, sipas vlerësimeve të eurodeputetit gjerman, ekspertit të shëndetit, Peter Lisse, nga pranvera dhe vera do të ketë rreth 150,000,000 evropianë të vaksinuar.
Informacioni i “Bild” konfirmohet edhe nga kreu i Partisë Popullore Evropiane në Parlamentin Evropian, Manfred Weber (CSU). “Unë mund të sinjalizoj fundin e alarmit. Marrëveshjet do të nënshkruhen në orët e ardhshme dhe më pas do të ratifikohen ligjërisht nga vendimet e nesërme të Komisionit” tha ai.
