Ditët e fundit çështja më shqetësuese dhe më e përfolur në të gjitha mediat ka qënë ajo e shembjes dhe rindërtimit të Teatrit Kombëtar.
Pothuajse të gjithë aktorët kanë dhënë mendimet e tyre në lidhje me këtë çështje, disa pro e disa kundra shembjes së godinës.
Erion Isai, drejtori i Teatrit të Kukullave ishte një aktorët që doli pro shembjes së Teatrit Kombëtar dhe e bëri publik mendimin e tij nëpërmjet një statusi në Facebook.
Menjëherë pas tij aktori Gentian Zenelaj, i cili është shprehur kundër vendimit për shembjen e Teatrit, i është drejtuar me një status në Facebook ish-kolegut Erion Isai.
“Për Erion Isain dhe të tjerë:
Po pija kafen e paraprovave Erion dhe lexova ato rreshta që ke shkruar për situatën e teatrit. Me ra në sy krahasimi që i bën kolegëve të tu me minjtë e teatrit…pastaj i quajte mitingarë , partiakë, zhurmanjosë etj etj…Në fillim u revoltova pastaj piva edhe një kafe tjetër dhe vendosa të shkruaj dy rreshta unë për ty. Erion je drejtor i ri, je pak a shumë si një nuse e re …Po kështu i themi ne nga anët tona. Nusja e re…dhe si nuse e re ke shumë vështirësi përpara, ke beteja të përhershme me kunatat e tjera, ata që janë drejtorë ose ata që nëpërmjet partisë duan të bëhen drejtorë si ty. Por ke detyrēn e vështirë ti fitosh edhe zemrën vjehrrës së bashkisë dhe sidomos vjehrrit të kryeministrisë… E di Erion nuk e ke aspak të lehtë, e ka politika këtë gjë, të detyron të gëlltisësh gjëra që nuk duhet dhe problemi është që nuk i vjell dot më, do i kesh në bark tërë jetën. I quajte koleget e tu partiake Erion, por harron që aty ka shumë kolegë, ka kolegë që flasin në skenë, por ka kolegë edhe poshtë që dëgjojnë. Po quan partiak Robert Ndrenikën??? Aman ma thuaj emrin e partisë së Robertit që ta votoj gjithë jetën… Po quan partiak Mirush Kabashin ??? Roza Anagnostin? Si quhet partia e tyre Erion ??? Se do ti ndjek gjithë jetën… Sepse i kam politikanët e mi të preferuar, kanë qënë edhe të tutë Erion, por në mes të rrugës zgjodhe teatër tjetër. Erion prano një këshillë nga një njeri që të njeh që në krye të herës..Mos u bëj marionetë Erion. Sepse meqe sapo je bërë drejtor i Teatrit Kombëtar të Kukullave duhet ta kesh kuptuar tashmë si funksionon marioneta. Ka me fije nga sipër, por ka edhe nga ato që u futet dora poshtë… Kam vendosur mos ta marr për fyerje asnjë nga epitetet e tua Erion. Seriozisht, por shumë seriozisht po ta them … Mendo për këto që të thashë… Seriozisht!” – shkruan Gentian Zenelaj në statusin e tij.
