Fqinji ynë jugor, Greqia, po përballet me vështirësi të shumta në lidhje me menaxhimin e valës së dytë të covid-19. Sipas mediave helene, autoritetet kanë nisur aplikimin e masave kufizuese, të cilat janë njoftuar për tre javët e nëntorit.
Nëse nuk do të ketë përmirësime, autoritetet kanë deklaruar se mund të ketë një zgjatje të bllokimit dhe se plani e skenari pas 30 nëntorit është në tryezë të kryeministrit Mitsotakis dhe presidentes greke.
Sipas raportit të djeshëm të Ministrisë së Shëndetësisë greke, të dhënat ishin të frikshme ku ishin
3,316 raste të reja, nga të cilat 828 në Selanik dhe 756 në Atikë, 310 pacientë të intubuar dhe 50 vdekje në 24 orë.
Përkeqësimi i kushteve të motit e bën situatën edhe më të vështirë, pasi favorizon përhapjen e covidit.
Në këtë kontekst, shtrirja e masave kufizuese do të jetë rruga e vetme, siç është mbyllja e shkollave fillore dhe ndalimi i plotë i trafikut në të paktën disa zona, me skenarin e njëjtë që u aplikua edhe në fillim të marsit.
Profesori i Inxhinierisë së Mjedisit të Universitetit Aristoteli të Selanikut, Demosthenes Sarigiannis , ka deklaruar se duhet një periudhë afërsisht 8 javore, që vendi të ketë rënie të rasteve të reja.
“Do të duhen tetë javë karantinë që vendi të bjerë nën 500 raste, një kufi i vendosur nga Ministri i Shëndetësisë Vassilis Kikilias për heqjen e bllokimit”, ka deklaruar profesor Demosthenes për gazetën “Protothema”./Iconstyle.al/
