Prej 1 qershorit qytetarët i janë kthyer jetës normale, duke mësuar si të bashkëjetojnë me Covid-19 pasi qeveria ka hequr kufizimet dhe zonat e kuqe.
Tashmë të gjithë i janë kthyer jetës së mëparshme, punës, protestave, grumbullimeve, teksa virusi duket për shumë persona se i përket të kaluarës.
Nga ana tjetër, Ministria e Shëndetësisë raporton për dhjetëra të infektuar çdo ditë, teksa fatmirësisht numri i viktimave është i ulët.
Ajo që është vënë re kohët e fundit është se fasonerive, që deri dje ishin cilësuar si vatra “të nxehta” infeksioni, vendin u kanë “zënë” insitucionet shëndetësore, por jo vetëm.
Këto janë institucionet e vendit ka dhjetëra të infektuar e shumë të tjerëve u janë marrë tamponët, sipas Dosja.al.
Qendra Shëndetësore nr 9 dhe spitalet private: Vetëm në qendrën shëndetësore numër 9 në Tiranë janë të infektuar 6 mjekë dhe infermierë. Sakaq është infektuar edhe një punonjës i Klinikës së Specialiteteve numër 2 dhe 1 është punonjës i një spitali privat. Gjithashtu, 2 punonjës administrate, një në shtet dhe një në privat janë të infektuar. Ndërsa zonat më “të nxehta” të Tiranës janë: Astir, Rr. Kavajës, Vasil Shanto, Kamëz, pranë mozaikut të Tiranës, ish-stacioni Trenit, Komuna e Parisit, Brryli, Babrru, Tiranë E Re, hotel Mondial, Don Bosko, Vaqarr, rr.Andon Z. Cajupi, rr.Elbasanit, rr. Kastriotët, pranë Policisë Bashkiake.
Drejtoria e Shëndetit Publik në Krujë: Më 3 qershor rezultoi e prekur nga Covid-19 një punonjëse e Shëndetit Publik në Krujë, e cila është u infektua duke marrë tamponët tek pacientët. Pasi ajo u konstatua me koronavirus është karantinuar bashkëshorti i saj mjek, ndërsa testi i parë i tij doli negativ.
Kadastra Durrës: Dy ditë më parë u prekën nga virusi, sportelista e këtij institucioni dhe një specialiste sektori. Ndërkohë më 1 qershor Dosja.al raportoi se ishin infektuar dy punonjës, një sporteliste me iniciale K.Gj dhe kushëriri i saj, me inicale L.Gj, punonjës terreni. Të infektuar rezultuan edhe familjarët e tyre, teksa janë karantinuar kolegët e tyre.
Spitali Durrës: Në këtë spital është i infektuar mejku i njohur, Beqir Gelaj dhe dyshohet se shkak i infektimit për herë të dytë i mjekut këtë është bërë vajza e tij, mjeke në QSUT.
Qendra spitalore universitare në Tiranë: Më 27 maj një infermerie në QSUT rezultoi e prekur nga Covid-19 dhe infektoi dhjetëra kolegë dhe pacientë të saj. Pëllumb Pipero deklaroi se vetë, infermierja infektoi 13 kolegë të saj. Më 28 maj Ministria e Shëndetësisë njoftoi se janë 20 të prekur në QSUT, personel shëndetësor dhe pacientë. Ndërsa më 1 qershor ka rezultuar i infektuar edhe një mjek kardiolog, i cili punon në shërbimin e sëmundjeve të brendshme në QSUT.
Siç edhe shihet për këto raste, MSH ka dhënë shumë pak detaje për rastet, ose mund të themi më mirë, aspak.
Pse ministria e Shëndetësisë “mbyll” gojën, ndërkohë që duhet të jetë transparente me publikun? Si kryen tamponët në fshehtësi dhe a duhet të nisë një hetim për këtë çështje? Publikut nuk i interesojnë emrat e përveçëm, por vatrat e infeksionet duhet të bëhen publike, pasi në këtë mënyrë mund të parandalohet përhapja e virusit.
MSH deklaron se vijojnë hetimet epidemiologjike, por për rastet e mësiperme nuk dihet asgjë. A mos ndoshta në këtë situatë janë shumë të nevojshme testimet masive?
