Një punonjës i aneksit të Bibliotekës Kombëtare, i cili ndodhet pranë “Urës së Tabakëve” në Rrugën e Elbasanit, ka rezultuar pozitiv me koronavirus.
ABC News njofton se tamponi u është marrë edhe 2 punonjësve në Bibliotekën Kombëtare, të cilat kanë shfaqur simptoma të koronavirusit.
Ndërkohë që pritet të dalë rezultati, është kryer dezinfektimi në ambientet e Bibliotekës së vogël por edhe në Bibliotekën qendrore, sallat dhe ambienteve përreth saj.
Aktiviteti i sotshëm i planifikuar për tu bërë te “Muzeu i Gjetheve” është zhvilluar me një numër të reduktuar pjesëmarrësish dhe punonjësve të bibliotekës.
Drejtori i Bibliotekës Kombëtare Pirro Misha nuk ishte i pranishëm në këtë aktivitet, por ka qenë e pranishme Ministrja e Kulturës Elva Margariti. Ende nuk dihen rrethanat se si është infektuar punonjësja e Bibliotekës së Vogël, ende vijon hetimi epidemiologjik për të parë se nga ka hyrë ky infektim.
Ndërkohë, virusi ka hyrë edhe në institucionet e drejtësisë. Ditën e djeshme dy institucione të tjera në organet e drejtësisë janë prekur nga koronavirusi. Pozitiv me Covid-19 kanë rezultuar një gjyqtar i Gjykatës së Apelit, si dhe një punonjës në Gjykatën e Lartë.
/ABC News
