104 të infektuar dhe 4 viktima- ky është bilanci nga COVID-19 në vendin tonë, teksa bëhet me dije se 49 prej tyre janë të shtruar në Spitalin Infektiv.
Duke qenë se kjo javë është cilësuar si piku i pandemisë në vendin tonë, pritet që numri i të prekurve të rritet, e rrjedhimisht edhe nevoja për respiratorë.
Më në fund, pasi konfirmoi dyshimet për mungesën e respiratorëve, Ministria e Shëndetësisë dhe Mbrojtjes Sociale ka bërë një deklaratë me shifra konkrete për respiratorët që do të merren në vendin tonë për të infektuarit me Covid-19.
Në një deklaratë për mediat, Ogerta Manastirliu është shprehur se do të blihen 54 respiratorë dhe kontrata është gati, teksa shtoi se po vijojnë procedurën për 100 respiratorë të tjerë, që do të mbërrijnë sipas një kalendari të mirëpërcaktuar.
“Po lidhim kontratën për blerjen e 54 respiratorëve dhe vijojmë procedurën për 100 respiratorë të tjerë, që do të mbërrijnë sipas një kalendari të mirëpërcaktuar”, tha Manastirliu.
Mirëpo, kjo është një shifër shumë e vogël për të përballuar epideminë në Shqipëri.
Mjafton të përmendim se sistemi shëndetësor italian kishte në gjendje 3000 të tillë dhe hapi një tender për 5000 respiratorë të tjerë për të përballuar fluksin e pacientëve me probleme të theksuara të frymëmarrjes. Ndërsa në vendin tonë, respiratorët janë në numrin më minimal për të “zgjidhur” situatën.
Për këtë arsye, duhen rishikuar edhe njëherë tenderat e tjerë si ata të Bashkisë së Tiranës apo OSHEE (Lexo këtu), të cilët po shpërdorojnë para të cilat momentalisht duhet të kanalizohen në nevojat e shërbimeve të shëndetësisë.
