Nëse deri dje, një metër katror banesë në zonat periferike të Tiranës (Farkë psh) vlerësohej me 66.5 mijë lekë, tani vlerësohet 115.2 mijë lekë.
Nga muaji i kaluar kanë hyrë në fuqi çmimet e reja të referencës. Si pasojë e rritjes së çmimeve të referencës, taksa e një familjeje në një zonë si Farka është rritur në 5800 lekë ose 55 euro në vit, (100*115200*0.05%).
Kjo rritje i faturohet qytetarëve në faturën e ujit. Sikur të mos mjaftonte kjo është vetëm për taksën e banesës. Tani qeveria do të prekë edhe taksën e truallit, duke e shumëfishuar atë.
Abuzimet e qeverisë vazhdojnë pasi në vitin 2028, formula ndryshon dhe taksa e truallit nuk do të llogaritet më si fikse për metër katrorë, por do të shumëzohet edhe kjo mbi çmimin e referencës. Për rrjedhojë taksa për truallin 500 metër rritet nga 280 lekë që është aktualisht në 13 mijë e 36 lekë në vit.
Për këtë rritje të çmendur qeveria justifikohet se në zonat periferike jetojnë të pasurit e komplekseve luksoze. Por taksa nuk do të kursejë as familjet me të ardhura të pakta që jetojnë shumë më parë se sa të lindin komplekset e të pasurve.
Me projektligjet dhe nismat që qeveria ka hedhur në publik, taksa e pronës do të jetë gunga e re fiskale në kurrizin e familjeve shqiptare, që do t’u marrë atyre qindra milionë euro taksa shtesë në vit.
