Bota po bëhet gjithnjë e më e zhurmshme! Këtë mund ta keni kuptuar kur jeni arratisur nga qyteti ku jetoni për një fundjavë në mal apo në det.
Ndotja akustike, e cila është e pranishme në metropolet e mëdha dhe jo vetëm, po arrin në nivele shumë shqetësuese për shëndetin tonë.
Vendi me më shumë zhurmë është Guangzhou ose Canton, qyteti më i madh bregdetar në jug të Kinës, ndërsa më “i heshturi” është Cyrihu në Zvicër.
Mes 50 metropoleve të analizuara nga një studim gjerman, Italia përfaqësohet nga Roma e Milano, ku kryeqyteti pozicionohet jashtë 10-shes (e 14-ta).
Disa shkencëtarë të “Charite University Hospital” në Berlin kryen një studim në bashkëpunim me kompaninë gjermane “Mimi Hearing Technologies”, për të treguar lidhjen mes jetesës në qytete të zhurmshme dhe humbjes progresive të dëgjimit.
Projekti realizoi 200 mijë teste të dëgjimit në 50 qytete ndërkombëtare, duke grumbulluar të dhëna që janë kombinuar pastaj me ato të publikuara nga “Organizata Botërore e Shëndetësisë” mbi ndotjen akustike.
Rezultatet ishin shqetësuese: 64% e pjesëmarrësve ka rezultuar pozitiv ndaj këtij fenomeni.
Qytetet me nivelin më të lartë të ndotjes akustike, përqendrohen në kontinentin aziatik, por spikasin edhe tre kryeqytete evropiane dhe një amerikanolatine. Asnjë qytet amerikan, ndërkohë nuk shfaqet në këtë “top 10” të zhurmës urbane.
Ndërsa qytetet më të qeta (dhe të jetueshme), gjenden kryesisht në Europë, me katër qendra të mëdha urbane në Gjermani. Vetëm Portland përfaqëson kontinentin amerikan në këtë renditje.
