Tiranë/ Ekspozita “Migel de Servantes ose dëshira për të jetuar” (30 qershor-28 korrik)
Galeria Kombëtare e Arteve ka hapur më 30 qershor 2016, ora 19:00, ekspozitën “Migel de Servantes ose dëshira për të jetuar”, organizuar nga Instituti Servantes, Aksioni Kulturor Spanjoll (AC/E) dhe Agjensia Spanjolle e Bashkëpunimit Ndërkombëtar për Zhvillim (AECID), për të përkujtuar këtë vit 400 vjetorin e vdekjes së shkrimtarit.
Projekti, i konceptuar dhe realizuar nga Navia, paraqet përmes 50 fotografive, një udhëtim pamor nëpër vendet dhe shtigjet ku kaloi Migel de Servantes përgjatë jetës së tij, një jetë e trishtuar dhe e pasigurtë që na shfaqet me një dozë misteri në veprat e tij.
Në këtë ekspozitë, që mund të shihet deri në datën 28 korrik 2016, të 50 fotografitë që përbëjnë këtë ekspozitë janë të shoqëruara me tekste dhe citime letrare që i lidhin sa me shkrimtarin, aq edhe me veprat e tij. Alkala de Henares, Vajadolid, Madrid, Napoli, Siçili, Lepantos, Tunizi, Argjel, Oran, Lisbonë, Eskivias, Toledo, La Mancha, Andaluzia, apo Barcelona, janë disa prej vendeve, pjesë e itinerarit jetësor të Miguel de Servantesit.
Tiranë/ Kinemaja Verore (Përfundon më 31 korrik)
“Kinemaja verore”, është një ide e Julia Sinanajt për të rinjtë për të shijuar një film të bukur, në ambient të hapur krah miqve më të mirë. Për këtë mund të jemi gjithmonë gati!
Organizatorja Sinanaj është shprehur se ky trend i rikthyer është socializim. “Këtu mund të vijë çdo person, hyrja është e lirë, nuk ka asnjë lloj pagese për të parë filmin në lulishte. Ne kemi shumë nevojë që të rrimë dhe të ndajmë më shumë kohë me njëri tjetrin. Për mua një nga gjërat e para është socializimi. Një arsye tjetër është se ne po japim filma shumë të mirë”, shprehet Sinanaj.
Kinemaja verore do të zgjasë deri në fund të muajit korrik. Por kjo nismë vitin do të nisë që në muajin prill. Ndërsa pritet që të ketë disa kinema. Sapo ju sollëm një ide se si ta kaloni mbrëmjen e së dielës, pas diellit të plazhit të paradites.
Festivali Butrinti 2000/ “Made in Albania”
Festivali Ndërkombëtar i Teatrit BUTRINTI 2000, edicioni i 14, këtë vit do të zhvillohet në datat 19 deri 23 korrik 2016 në Teatrin e Qytetit Antik të Butrintit. Në këtë edicion do të performojnë në skenen magjike të Butrintit, trupa teatrore nga Shqipëria, Bullgaria dhe Spanja, sikundër edhe një shfaqje koncertale nga Greqia, shkruan KultPlus.
Shfaqja e suksesshme “Made in Albania”, me autor Stefan Çapalikun dhe regjisor Altin Bashën do të hapë natën e parë të festivalit më date 19 korrik 2016. Nata e dytë e festivalit do të vazhdojë me një shfaqje koncertale nga Korfuzi, Greqi, drejtuar nga dirigjenti Alkis Baltas. Në këtë koncert të veçantë, pritet pjesëmarrja e 60 artistëve.
Shfaqja “Shtëpia e Bernarda Albës”, e regjisores Diana Dobreva prezantohet nën interpretimin e aktorëve bullgarë nga Sofja. Një nga regjisoret më të njohura në Bullgari , Diana Dobreva rikthehet në Butrint, fituese e çmimit të kritikës në Avignon, në vitin 2011. Fituese e çmimit ASKER si shfaqja më e mirë e vitit 2015 në Bullgari.
Shkodër/ Festivali Mbarëkombëtar i Këngës për Fëmijë (13-15 korrik)
Festivali Mbarëkombëtar i Këngës për Fëmijë, ideuar 54 vjet më parë do të organizohet edhe këtë vit në qytetin e Shkodrës. Priten 30 solistë në konkurrim me kompozime nga autorë nga të gjitha trevat shqipfolëse. Në tri netët festivali do të ketë të ftuar edhe fëmijë valltarë e humoristë, duke treguar nëpërmjet spektaklit, prirjet e tyre artistike.
Festivali organizohet nga Bashkia Shkodër,Drejtoria Arsimore Rajonale, Qendra Kulturore e Fëmijëve,Televizioni Shqiptar dhe Shoqata “Shpirti Artistik i Shkodrës”, me mbështetjen e Ministrisë së Kulturës, i cili nis më 13 dhe do të zgjasë deri më 15 korrik.
