Kur vendosa që të shkarkoja një aplikacion njohjesh në celularin tim nuk e kisha aspak të lehtë (pavarësisht se ishte vetëm për çështje pune, por nuk i dihet asnjëherë se kë mund të rastisësh). Fillimisht sepse bota është shumë e vogël, e sidomos Shqipëria, kur njerëzit njihen pothuajse të gjithë e gjysmën i ke kushërinj. Dhe së dyti sepse seriali i “Sex and the City” më kishte krijuar tashmë një ide sesi do të ishte fundi.
Më sugjeruan “Tinder” pasi është aplikacioni më “in” i momentit dhe më i besueshëm. Nisja s’ishte aspak e lehtë, në kryqëzimin për të mbajtur identitetin tim të vërtetë apo jo, zgjodha një të mesme të artë: pseudonimin, që ma dinë të afërmit, një foto me kurriz dhe të vendosja profesionin tim.
Si funksionon?
M’u deshën pak minuta para se të kuptoja se nuk kisha lënë mashkull pa “gjuajtur” (pa i dhënë “like”). Me një lëvizje gishti mund t’i japësh personave që të pëlqejnë nga fotoja e profilit apo përshtaten karakteristikave që dëshiron “like” ose “nope”.
Çfarë më ndodhi mua?
Në Shqipëri duket se është ende një tabu për femrat që të kenë një aplikacion për të njohur njerëzit. Stereotipat e paragjykimeve janë dy: ose po kërkon burrë ose do dikë për t’u “kënaqur”.
Pavarësisht kësaj nisa të flisja me disa meshkuj, ata që më ngjanin më interesantë, si pamje por edhe në bisedat që shkëmbenim bashkë.
Rasti 1
Kur njoha djalin, që po vendos ta quaj në këtë shkrim “Eni”. M’u duk për t’u habitur sesi një mashkull i plotësuar, me të cilin mund të shkëmbeje biseda interesante, kishte një aplikacion të tillë dhe nuk njihte femra jashtë botës virtuale. Zgjedhja e tij! Vendosëm që pas disa bisedave të kishte një takim mes nesh dhe po, ai ishte fiks si në foto: brun, me mjekër dhe mbi 1.80 cm i gjatë. Një takim të tillë nuk mund t’ia lija pa ia treguar mikeshave të mia, duke i dhënë edhe detajet e profilit të tij se kush ishte. Por ajo që hasa në një nga bisedat për Enin, nuk më pëlqeu aspak. I njëjti person, një ditë më pas kishte pasur një takim me një nga shoqet e mia, me të cilën kishte konsumuar të njëjtat biseda. Jam xheloze? Aspak! As ëndërrimtare apo e zhgënjyer! Thjesht, nuk isha më në gjendje të flisja me të.
Rasti 2
Kur hasa Endrin (emër i trilluar) mendova se ndoshta u nxitova pak me Enin, por ishte paksa vonë. Ai ishte nga ata meshkuj që mund të flasin çdo minutë dhe gjejnë një gjë të re për të thënë. Të gjithë kemi hasur një të tillë në jetën tonë, por çështja është a bie apo jo në grackën e tij! Endri ishte aq “i hapur” sa më dërgonte foto nga vendi ku po pinte kafen e mëngjesit dhe nuk flinte asnjëherë pa më thënë natën e mirë. Okej se kjo zgjati vetëm për 3 ditë, derisa doli direkt në temë: të kalonim një natë pasionante… por vetëm një. Mund ta imagjinoni që tema degradoi me detajet, sa më detyroi që të nesërmen ta zhdukja “Tinder”-in nga celulari im.
Gjithsesi nuk duhet t’i humbësh kurrë shpresat, shpirti binjak mund të jetë nga ana tjetër e telefonit për të kërkuar të tijin. Thjesht, ky nuk ishte rasti im!
