Pjesa më e madhe e vendeve në mbarë botën kanë arritur të sigurojnë vaksinat anti-Covid, me shpresën se mund të arrihet imuniteti ndaj virusit. Shpresat janë që me vaksinën mund t’i rikthehemi jetës normale në disa aspekte, veçanërisht kur vjen puna tek udhëtimet, që është një nga pjesët më të goditura nga pandemia. Për këtë rast pasaporta e vaksinës mund të jetë një dokument i nevojshëm për të udhëtuar dhe për të mundësuar kalimin e kufijve pa ndërprerje.
Po çfarë është një pasaportë vaksine?
Pasaporta e vaksinimit është dokumentacion që vërteton se ju jeni vaksinuar kundër COVID-19. Do të ketë edhe versione të tilla që do të dëshmojnë se një person ka rezultuar negativ kundër Covid-19 dhe se mund të udhëtojë lehtësisht në mbarë botën. Tashmë po punohet që versionet e këtyre pasaportave të jenë të digjitalizuara dhe që çdo person të ketë akses në to përmes celularit.
Nënkryetari i një aeroporti, Nick Caren, ka shpjeguar se pasaportat e vaksinimit mendohet të jenë të digjitalizuara në mënyrë që të gjithë njerëzit ta kenë më të lehtë për të udhëtuar dhe të mos tërheqin dokumentacione për të lëvizur nga një shtet në tjetrin.
Në mesin e atyre që prodhojnë pasaporta, janë kompania biometrike iProov dhe kompania për siguri kibernetike, Mvine, që kanë krijuar një pasaportë të vaksinës që po testohet në Shërbimin Kombëtar të Shëndetësisë së Britanisë, pasi mori fonde nga Qeveria e Mbretërisë së Bashkuar.
Themeluesi dhe njëherësh shefi ekzekutiv i kompanisë iProov, Andrew Bud beson se pasaportat e vaksinave duhet të përmbajnë vetëm dy informacione.
“Një është nëse ky person është vaksinuar dhe informacioni tjetër është se si duket ky person”, thotë ai.
Andrew Bud thotë se certifikatat e vaksinave tashmë kanë nisur të shpërndahen në disa shtete, dhe në Shtetet e Bashkuara, disa leje shëndetësore, të lëshuara nga sektori privat, po përdoren për të lejuar njerëzit të marrin pjesë në ngjarje sportive.
Pse është e nevojshme një pasaportë vaksinimi?
Shumë qeveri në mbarë botën po e shohin këtë si një mundësi për t’i dhënë sërish jetë ekonomisë, duke identifikuar lehtësisht të gjithë personat që nuk përbëjnë rrezik për transmetimin e Covid-19. Kjo pasaportë mund të nevojitet për të udhëtuar nga një vend i botës në tjetrin, pasi kjo do të jetë e vetmja formë që autoritetet shëndetësore të vërtetojnë nëse jeni vaksinuar apo jo.
Në mënyrë që gjithë bota t’i rikthehet normalitetit duhet që të vendosen disa rregulla dhe protokolle të përbashkëta dhe prandaj mund të jetë e domosdoshme pajisja me një pasaportë vaksinimi.
Skeptikët e pasaportave të vaksinimit
Shumë persona janë skeptikë për pasaportat e vaksinimit, pasi besojnë se këto pasaporta përmbajnë në vetvete probleme sociale. Njerëzit që nuk dëshirojnë të marrin vaksinën, apo që nuk bëjnë pjesë në kategoritë më të rrezikuara dhe do vaksinohen të fundit, si për shembull të rinjtë, mund të përjashtohen nga shumë aktivitete. Megjithatë vendimi final nuk është marrë ende, ndaj pritet që kjo çështje të shqyrtohet më gjatë nga qeveritë.
