Në fillim të muajit dhjetor, Komiteti Teknik i Ekspertëve njoftoi ndryshimet e vogla në masat anti-Covid, shumica prej të cilave vijon të mbetet në fuqi prej muajsh.
Ndër të tjera, vazhdoi të mbetej në fuqi orari i kufizimit 23:00 të darkës deri në 06:00 të mëngjesit. Në këtë fashë orare, supozohet që çdo biznes të jetë i mbyllur.
Pavarësisht masave kufizuese që supozohet të jenë vendosur për të gjithë personat e subjektet, disa lokale e restorante në Tiranë, Durrës, plazh, Korçë etj, ‘kanë futur mik’ për qeverinë dhe kanë vazhduar të qëndrojnë të hapura prej kohësh, pavarësisht situatës delikate në të cilën jemi.
Aktiviteti i tyre ka vazhduar normalisht edhe pas fashës orare të ndaluar me ligj dhe njerëzit kanë vazhduar të grumbullohen duke vendosur në rrezik jetën e tyre dhe të personave të tjerë me të cilët kanë kontakte.
Corona “ka hedhur valle” në këto lokale, ndërkohë që pjesa tjetër e tyre po falimenton për shkak të mbylljes. Që këto masa të kenë efekt, duket të zbatohen nga të gjithë dhe jo të bëhet një vesh shurdh e një sy qorr për një pjesë të subjekteve.
Përveç rrezikut të përhapjes së virusit, po bëhet gjithashtu një konkurrencë e pandershme mes bizneseve.
Kemi parë shpesh se si policia nuk ka marrë asnjë lloj mase ndaj disa biznesve që kanë shkelur të gjithë rregullat e pandemisë, duke nisur nga shkelja e orarit e deri tek mosrespektimi i distancës. Lidhja e drejtpërdrejtë e disa biznesmenëve me qeverinë apo edhe dhënia e parave nën dorë, i ka lejuar shumë prej tyre të vazhdojnë të lirë aktivitetin. Nga ana tjetër ata më “të dobëtit” nuk kanë mundur të bëjnë asnjë lloj manovre.
Orari i kufizimit ka ndikuar në thellimin e krizës ekonomike të këtyre bizneseve, ndërsa shteti shqiptar nuk dha e nuk vazhdon të japë asnjë lloj ndihme për t’ia lehtësuar sadopak vështirësitë e tyre financiare.
Në vend ka rreth 14 mijë bare dhe rreth 4 mijë restorante, duke na bërë ndër të parët në botë për numrin e lokaleve në raport me popullsinë, por njëkohësisht këto janë edhe fronti më i madh privat i punësimit të individëve.
Në listën e aktiviteteve që qëndrojnë të hapura përmendim këtu:
- Kazinonë tek ish-hotel “Sheraton”
- “Grand Casino” tek hotel “Plaza”
- Kazinonë tek “Taivani:
- Lokali në katin e fundit të hotelit “Plaza”
- Lokali i Tom Doshit në zonën e Freskut
- Kazinonë tek “Marina Bay” në Vlorë
- “Prestige” Resort në Malin e Robit
- Marketi në rrugën “Irfan Tomini” ku mbeti i vrarë një i ri, qëndronte i hapur jashtë orarit të lejuar
- etj.
Rikujtojmë se që prej vitit 2016, sipas EUROSTAT, të ardhurat për frymë në Shqipëri kanë mbetur të pandryshuara, në 30% të mesatares së BE-së.
Raporti i publikuar nga Eurostat e klasifikon Shqipërinë tek vendet me të ardhurat më të ulëta në rajon për frymë, dhe për pasojë kanë edhe nivel të ulët konsumi.
