Ajo që shohim në ekran është ajo që shumë të famshëm na tregojnë. Por jeta e personazheve më të njohur të ekranit shqiptar, nuk nis dhe përfundon me punën e tyre si artistë.
Falë famës dhe emrit që ata zotërojnë, këngëtarë, moderatorë dhe aktorë të njohur në Shqipëri, kanë hapur biznesin e tyre personal, që jo të gjithë ua dinë. Ne po ju sjellim punën e dytë pas ekranit, që disa të famshëm bëjnë dhe bizneset që ata zotërojnë, përpos asaj që shohim çdo ditë.
Noizy – Ka një markë veshjesh.
Reperi shqiptar ka krijuar brand-in e tij të ri, që quhet “Illyrian Blood” pra “Gjak Iliri”, një linjë veshjesh patriotike që Noizy e reklamon shpesh, duke veshur figura të njohura të ekranit.
Zaimina Vasjari- Dyqan veshjesh
Zaimina është pronarja e një prej dyqaneve më të njohura sa i përket fustaneve. Falë linjave elegante, bukuroshja ka arritur t’i bëjë reklamën më të mirë biznesit të saj, duke i veshur personalisht veshjet dhe duke i reklamuar.
Greta dhe Eni Koçi- Dyqan veshjesh
Janë dy biznesmenet më të reja të cilat kanë hapur së fundi një dyqan me veshje në kryeqytet. Dy motrat kanë fatin të reklamojnë vetë veshjet, duke qenë se kanë shumë fansa në Instagram. A nuk është kjo reklama më e mirë?!
Bes Kallaku- Pronar Restoranti
Pas aktrimit dhe muzikës, tashmë Bes Kallaku i ka hyrë fuqishëm biznesit të ri në Tiranë. Reklama që i bën restorantit të peshkut në rrjetin social “Instagram” nuk mungon dhe ai ka edhe një mbështetje tjetër, atë të bashkëhsortes Xhensila, e cila gjithashtu reklamon restorantin në profilin e saj me 798 mijë ndjekës.
Amarda Toska dhe Ermal Mamaqi – Sallon Nusërie
Fama që krijuan me daljen e tyre në televizion dhe më pas me martesën, duke u bërë një nga çiftet më të dashur të ekranit, e lejoi Amarda Toskën dhe Ermal Mamaqin të kenë sukses me sallonin e nusërisë, ku përveç fustaneve ofrojnë arredimin dhe muzikë. Tashmë biznesi është kthyer familjar, ku janë punësuar edhe të afërm të çiftit, mes të cilëve edhe vëllai i Mamaqit, si DJ.
Xhemi Shehu- qendër estetike
Pak e njohin jetën e saj private përpos asaj që shohim çdo të diel në emisionin “Portokalli”. Por Xhemi ka një ndër qendrat estetike më të njohura në kryeqytet të cilën e reklamon jo pak herë në profilin e saj. Figura e saj dhe pamja fizike i shërbejnë më së miri biznesit që Xhemi ka me bashkëshortin, Ervin Sula, edhe pse ky biznes nuk është i vetmi që ai menaxhon.
Valbona Selimllari – Aksionere në qendër tregtare!
Emri i saj është i lidhur me një nga qendrat më të njohura tregtare në kryeqytet. Nuk mund të themi me siguri që Valbona është pronare apo aksionere e dyqaneve të tij, por reklama që ajo i bën vazhdimisht në Instagram, na bën të dyshojmë për lidhjen e saj me këtë biznes.
Rovena Dilo- Pronare e lokalit
Këngëtarja e bëri publike që zotëronte një prej lokaleve më të njohur në zonën e ish-bllokut, kur deputeti Tom Doshi kërkoi të drejtën e pronës. Pas shumë përpjekjesh, Rovena hoqi dorë nga lokali luksoz, për t’u zhvendosur pak metra më tutje, në një tjetër ambient fantastik, ku nuk mungojnë netët e muzikës live.
Rozana Radi -Biznes fustanesh
Përpos faktit që ajo tashmë së bashku me mikeshën e saj Fiori Dardha moderojnë emisionin investigativ “Boom” në Ora News, këngëtarja ka menduar të vijë më pranë publikut edhe në fushën e biznesit. Ajo vesh personazhet e famshme në skenë, dhe dukshëm i ka hyrë biznesit në fushën e modës dhe veshjeve.
Alketa Vejsiu – Dizajnuese e eventeve dhe Sallon nusërie
Alketa Vejsiu është përfshirë gjithashtu në fushën e modës me sallonin e nusërisë dhe të arredimit të dasmave. Emri i saj është një ndër më të lakuarit sa i përket biznesit të këtij lloji dhe shumë të njohur, përfshi çiftin Getoar dhe Marina Vjollca, ia besuan Alketës organizimin e ceremonisë së tyre martesore.
Armina Mevlani – Dy dyqane veshjesh
Ajo është një ndër blogeret më të njohura dhe ka shumë ndjekës në rrjetet sociale, që e komplimentojnë çdo ditë për stilin e veçantë të veshjeve të saj në përditshmëri dhe evente ku merr pjesë si e ftuar. Kjo e inspiroi që modën ta kthejë tani e tutje në profesion të parë e fitimprurës me një butik markash të njohura, në ish-bllok që e ka hapur që në 2015-n dhe një tjetër në një qendër tregtare në 2017-n.
Flori Mumajesi-Piceri
Ishte muaji prill, kur mediat folën për një “ndarje” nga biznesi të këngëtares Elvana Gjata dhe Flori Mumajesit. Dy artistët kishin investuar së bashku në 2014-n, në krijimin e një prej picerive më të njohura në Tiranë. Por largimi i Elvanës në SHBA, bëri që ajo t’i shesë aksionet e biznesit, i cili është i shtrirë jo vetëm në Tiranë por edhe në qytete të tjera, si dhe Kosovë. Tashmë Flori ka aksionet më të mëdha, bashkë me një mikun e tij.
