Një moment i tensionuar mes aktorit Timothée Chalamet dhe partneres së tij Kylie Jenner gjatë ceremonisë së ndarjes së çmimeve Oscars është bërë viral në rrjetet sociale, ndërsa tani është zbuluar edhe se çfarë kanë thënë në të vërtetë.
Sipas një analize ekskluzive të një lexueseje buzësh për Daily Mail, aktori 30-vjeçar dukej i zhgënjyer gjatë ceremonisë, ndërsa po bisedonte me Jenner në audiencë.
Chalamet ishte konsideruar një nga favoritët për të fituar çmimin “Aktori më i Mirë” për rolin e tij në filmin “Marty Supreme”, një film i regjisorit Josh Safdie i frymëzuar nga historia e një lojtari të ping-pongut në Nju Jorkun e viteve 1950.
Megjithatë, sipas mediave të huaja, gjatë javëve para ceremonisë aktori ishte përballur me kritika në publik. Madje burime për Daily Mail kishin folur edhe për një lëvizje të quajtur “Stop Timmy”, e cila kishte filluar të fitonte mbështetje përpara ndarjes së çmimeve.
Reagimet negative u shtuan edhe më shumë pasi Chalamet deklaroi në një intervistë se “askush nuk interesohet për baletin dhe operën”, një koment që u kritikua në rrjetet sociale.
Mbrëmja e Oscars duket se nuk shkoi sipas pritshmërive për aktorin. Çmimi për Aktorin më të Mirë përfundoi në duart e Michael B. Jordan për filmin “Sinners”, duke lënë Chalamet pa trofeun e shumëpritur.
Në një video të publikuar nga E! News, Chalamet shihet i ulur në audiencë pranë Kylie Jenner me një buzëqeshje të zbehtë në fytyrë. Sipas lexueses së buzëve Nicola Hickling, ai i tha Jenner:
“E urrej këtë.”
Jenner u përpoq ta qetësonte duke i thënë:
“Jemi mirë, në rregull?”
Ndërsa aktori iu përgjigj shkurt:
“Po.”
“Shpresoj kështu,” shtoi Jenner, me të cilën Chalamet është në një lidhje prej rreth tre vitesh.
Më pas, sipas interpretimit të leximit të buzëve, aktori i tha partneres së tij:
“Sonte kam nevojë për një përqafim të madh.”
Momenti i zhgënjimit të tij u vu re edhe kur fituesi i vitit të kaluar për Aktorin më të Mirë, Adrien Brody, shpalli emrin e Michael B. Jordan si fitues. Chalamet duartrokiti me mirësjellje, por dukej qartë i zhgënjyer nga rezultati.
Kategoria e këtij viti për Aktorin më të Mirë ishte një nga më të fortat, duke përfshirë emra të mëdhenj të kinemasë si Leonardo DiCaprio (One Battle After Another), Ethan Hawke (Blue Moon) dhe Wagner Moura (The Secret Agent).
Ndërkohë, Michael B. Jordan fitoi Oscarin e parë në karrierën e tij dhe u emocionua gjatë fjalimit të pranimit.
“Faleminderit të gjithëve në këtë sallë dhe atyre që më kanë mbështetur gjatë gjithë karrierës sime,” tha ai mes emocionesh. “E di që doni që unë të bëj mirë, dhe unë dua ta bëj këtë sepse ju besoni tek unë.”
