Presidenti i SHBA-ve, Joe Biden, ka shprehur gjithmonë mbështetjen për Kosovën, duke i dalë në krahë edhe gjatë periudhës së luftës me Serbinë. Së fundmi Biden i ka kërkuar Serbisë të hedhë një hap të rëndësishëm, të vendosë marrëdhënie diplomatike me Kosovën për ta njohur si shtet të pavarur.
Presidenti i ri amerikan i kërkon homologut të Serbisë, Aleksandër Vuçiç, të vijojë përpjekjet për marrëveshjen me Prishtinën dhe për njohjen zyrtare të saj. Biden e ka dërguar mesazhin e tij me një letër drejtuar Serbisë me rastin e Ditës së Shtetësisë.
“Teksa kujtojmë 140 vite partneritet mes dy vendeve tona, SHBA-të e mbështetin pa lëkundje qëllimin e Serbisë për integrimin europian, si edhe arritjen e një marrëveshjeje gjithëpërfshirëse të normalizimit me Kosovën, të përqendruar te njohja reciproke”, shkruhet ndër të tjera në letrën e Joe Biden.
Letra e presidentit amerikan është botuar në disa media serbe dhe të Kosovës.
Nga ana tjetër nuk ka munguar as reagimi nga presidenti i Serbisë, Aleksandër Vuçiç. Ai është shprehur se sa i përket njohjes reciproke, nuk thuhet në asnjë akt të organizatave botërore dhe se ka pasur përpjekje për ta përfshirë në marrëveshjet e ardhshme, duke nënkuptuar takimin e shtatorit me ish-presidentin Trump.
“Kam marrë një mesazh urimi nga Presidenti Biden. Sa i përket njohjes reciproke, nuk thuhet në asnjë akt të organizatave botërore. Ka pasur përpjekje për të imponuar atë term si diçka që duhet ta kishim pranuar si zgjidhje përfundimtare. Por unë ua thashë çfarë mendoja për njohjen reciproke”, ka thënë Vuçiç.
Në 4 shtatorin e kaluar, Kosova dhe Serbia nënshkruan dy dokumente në Shtëpinë e Bardhë për normalizimin e raporteve ekonomike. Në atë takim presidentit serb iu ofrua të përfshinte te marrëveshja edhe termin “njohje reciproke”, por Vuçiç e hodhi poshtë dhe ky term u hoq nga marrëveshja e Uashingtonit. Sakaq dialogu mes palëve është lënë të vazhdohet në zyrat e Brukselit pas zgjedhjeve të 14 shkurtit në Kosovë.
