Bunkerët kanë tërhequr shpesh vëmendjen e mediave apo turistëve të huaj. Ditën e sotme media prestigjioze angleze, “BBC”, përmes një reportazhi tregon bunkerizimin e Shqipërisë nga ish-regjimi i diktatorit, Enver Hoxha.
“Është një mëngjes pranvere dhe dielli tashmë është i nxehtë. Unë jam duke ecur nëpër rrënojat e Orikumit, një vendbanim në epokën romake që shtrihet në fundin jugor të gjirit të Vlorës, në Shqipëri”, nis kështu reportazhi i “BBC”.
Përmes një udhërrëfyesi shqiptar nga Orikumi, në shkrim tregohet edhe forma sesi janë ndërtuar bunkerët.
“Duke u frikësuar nga pushtimi gjatë Luftës së Ftohtë, kreu i Shqipërisë Enver Hoxha e detyroi vendin e tij të ndërtonte dhjetëra dhe mijëra bunkerë. Shumë kohë pas rënies së regjimit, shumë prej tyre ekzistojnë ende”, shkruhet në reportazh.
Duke e cilësuar Shqipërinë si vendin më të izoluar të Europës në kohën e regjimit komunist, veprim i cili u shoqërua me pasoja të rënda, “BBC” shkruan se toka e shqiptarëve është ende e mbuluar nga bunkerët e Luftës së Ftohtë.
Shumë bunkerë janë shkatërruar në kohën kur Shqipërisë iu hapën dyert e lirisë pas dëbimit të sistemit, por një pjesë të tyre i gjen sot gjithandej nga Veriu gjer në Jug të Shqipërisë, ashtu siç e tregojnë edhe fotot e mëposhtme.
Burimi: BalkanWeb
