Ditët e fundit është vënë re një ulje drastike e rasteve me Covid-19 në vendin tonë. Fatmirësisht rastet fatale kanë qenë të pakta dhe shkalla e përhapjes së infeksionit është ulur.
Për këtë arsye ministrja e Shëndetësisë Ogerta Manastirliu ka konfirmuar ditën e sotme se do të kemi një lehtësim masash. Ditën e nesërme do të mblidhet Komiteti Teknik i Ekspertëve dhe pritet të merret vendimi për masat e reja. Lajmin për zbutjen e masave e konfirmoi edhe kryeministri Rana, cili u shpreh optimistë për sezonin veror të këtij viti.
“Nesër komiteti do dalë me planin e ri, me lehtësim të mëtejshëm të masave dhe ambicia jonë për të pasur një sezon turistik shumë më të lehtësuar se sa ai i vitet të kaluar besoj se do të përmbushet”, deklaroi Rama.
Me përmirësimin e situatës në përgjithësi do të ishte mirë që ora policore të shtyhej nga ora 22:00 në 23:00 ose 00:00. Gjithashtu mund të hiqet mbajtja e maskës në ambiente të jashtme, por e gjithë kjo mbetet në dorë të Komitetit Teknik të Ekspertëve.
Vendi ynë kaloi dy momente të rëndësishme që favorizojnë përhapjen e infeksionit, siç ishin zgjedhjet e 25 Prillit dhe festa e Bajramit në 13 maj. Ekspertët e shëndetit u shprehën të shqetësuar se këto dy ngjarje mund të ndikonin në shëndetin e qytetarëve, por periudha e inkubacionit kaloi dhe është vënë re se as njëra e as tjetra nuk kanë pasur ndikim në përhapjen e mëtejshme të infeksionit.
Mjeku infeksionit Tritan Kalo në një deklaratë të dhënë ditën e sotme shprehet se kjo dukuri lidhet me imunizimin aktiv, për shkak të kalimit të sëmundjes nga një pjesë e madhe e popullatës dhe vaksinimit që vijon prej muajsh në vendin tonë. Kjo do të thotë se ka ardhur koha për një hapje graduale të Shqipërisë, por duke qëndruar vigjilentë për kujdesin ndaj vetes, pa nënvlerësuar masat kryesore si: mbajtja e maskës në ambiente të mbyllura, higjienës personale dhe distancës fizike.
