Katër ditë më parë, kryeministri britanik Boris Johnson u bë baba për herë të pestë.
Partnerja e tij, Carrie Symonds, solli në jetë një djalë, i cili është fëmija i parë i çiftit.
Zëdhënësi i çiftit tregoi se nëna dhe foshnja janë shëndoshë e mirë dhe çifti është më i lumtur se kurrë për ardhjen në jetë të bebushit.
Partnerja e kryeministrit ka treguar në Instagram se ata i kanë vendosur një emër domethënës të voglit, për të nderuar mjekët që u kujdesën për Johnson duke e shpëtuar nga Covid-19.
Kështu, djali i tyre është quajtur Wilfred Lawrie Nicholas Johnson.
“Wildred, është emri i gjyshit të Boris-it, Lawrie është emri i gjyshit tim, ndërsa Nicholas e quajtëm në nder të dy mjekëve, Nick Price dhe Nick Hart, që shpëtuan jetën e tij muajin e kaluar.”- ka treguar Carrie Symonds.
Vogëlushi erdhi në jetë 17 ditë pasi kryeministri doli nga spitali, ku po kurohej për Covid-19.
Symonds është rikthyer për të jetuar me Johnson, pasi më parë ishte izoluar në Camberwell, në Londrën e Jugut, pasi vuante nga simptomat e koronavirusit.
Çifti njoftoi në shkurt se ishin fejuar dhe po prisnin një fëmijë, ndërsa Johnson ka edhe katër fëmijë të tjerë nga martesat e mëparshme.
