Suedia ishte shënjestra e një sulmi ditën e djeshme nga i cili humbën jetën 4 persona dhe 15 të tjerë janë plagosur, pasi një kamion mori përpara një turmë njerëzish në qendër të Stockholmit.
Siç raporton “Telegraph” të plagosurit ndodhen në gjendje shumë të rëndë shëndetësore.
Ndërkohë nga hetimet paraprake dyshohet se një nga autorët e sulmit, është një 39-vjeçar nga Uzbekistani, baba i 4 fëmijëve. Duket se edhe më parë ai propagandonte xhihadin nëpërmjet statuseve të tij në “Facebook”, në llogarinë e të cilit gjendeshin dhe fotografi të të plagosurve nga sulmet e mëparshme, si ato e Bostonit në prill të 2013-s.
Gjithashtu, orët e para të mëngjesit të sotëm u bë me dije se një person i 2-të, i cili mendohet të jetë përfshirë në sulmin e djeshëm, është vënë në pranga.
Kryeministri suedez, Stefan Löfven është shprehur se kjo tragjedi është një sulm i pastër terrorizmi dhe se do të bëjë gjithçka për sigurinë e popullit të tij.
“Terroristët duan që ne të kemi frikë, të mos jetojmë të qetë. Por ne do ta bëjmë, ata kurrë nuk mund të shkatërrojnë Suedinë”, deklaroi ai pas ngjarjes.
