Vlorë- Një i vdekur dhe një i plagosur kanë mbetur sot në orët e para të mëngjesit në fshatin Poro, si pasojë e një atentati.
Ngjarja u shënua rreth orës 01:10 dhe si pasojë e të shtënave me breshëri kallashnikovi, ka humbur jetën rrugës për në spital 22-vjeçari Sotiraq (Raqi) Mëhilli, ndërsa është plagosur rëndë Eno Mata 32 vjeç.
Dy të rinjtë po udhëtonin me motor në momentin kur janë qëlluar me kallashnikov. Ata ishin shokë, ndërsa policia bën me dijë se shënjestra e atentatit dyshohet të ketë qenë i plagosuri, Eno Mata.
Ky i fundit kishte më shumë se 6 muaj që ishte kthyer nga Greqia, ku ishte i dënuar për grabitje.
Eno Mata i njohur ndryshe si Aleksandër Mata, dyshohet se është një nga autorët e vrasjes së avokatit grek, Mihalesi Zafeiropoulos.
Ndërsa 22-vjecari që gjeti vdekjen, ishte një person pa probleme dhe pa precedentë sipas policisë.
Dyshimet e policisë
Dyshohet se vrasja e mbetur në tentativë e Matës është porositur në shtetin fqinj, Greqi. Në këtë shtet Eno Mata rezulton të jetë me precedentë penale, i akuzuar për grabitje me dhunë dhe për vrasjen e avokatit grek Mihalesi Zafeiropoulos, një krim të cilin vetë Mata e ka mohuar.
Ndërkohë autorët e atentatit në fshatin Poro të Vlorës kanë përfituar nga errësira dhe janë larguar me anë të një automjeti tip ‘Mercedes Benz 250’. Me të mbërritur në fshatin Bishan, ata i kanë vënë flakën makinës me të cilën ndoqën dy të rinjtë.
/Report tv
