Pasi një sërë vendesh europiane pezulluan vaksinën AstraZeneca, Agjencia Evropianë e Barbave, (EMA) ka marrë një vendim në lidhje me të. Pas studimeve të kryera, EMA ka dalë në përfundimin se vaksina AstraZeneca është e sigurt dhe efikase dhe se përfitimet e saj i tejkalojnë rreziqet.
Përmes një deklarate zyrtare, EMA shprehet se AstraZeneca nuk ka lidhje me rrezikun që kanoset nga trombozat në gjak. Drejtuesja e EMA-s, Emer Cooke, tha ditën e sotme se komiteti i agjencisë ka arritur në një përfundim të qartë shkencor dhe se nuk ka gjetur asnjë shenjë që mund të çojë në përfundimin se vaksina shton rrezikun për mpiksjen e gjakut.
Megjithatë agjencia ka bërë të ditur se do të vazhdojë të studiojë mundësitë e një lidhje mes vaksinës dhe mpiksjes së gjakut. Cooke shtoi se EMA nuk mund të përjashtojë përfundimisht lidhjen mes rasteve që kanë pësuar trombozë dhe vaksinës, ndaj për këtë arsye agjencia rekomandon që këto rreziqe të përfshihen në informacionin e përgjithshëm të vaksinës.
“Rreth 7 milionë njerëz janë vaksinuar tashmë me AstraZeneca në Europë dhe mbi 11 milionë të tjerë në Mbretërinë e Bashkuar dhe unë dua që të riktheksoj se pozicioni ynë shkencor është se kjo vaksinë është një mundësi e sigurt dhe efektive për të mbrojtur qytetarët nga Covid-19”, u shpreh Cooke.
Nga ana tjetër Organizata Botërore e Shëndetësisë ju ka bërë thirrje shteteve që e kanë pezulluar këtë vaksinë që të vazhdojë më përdorimin e saj. OBSH pritet që të publikojë vetë ditën e nesërme rezultatet e saj në lidhje me vaksinën AstraZeneca.
