Rihapja e universiteteve në datën 11 tetor është anuluar. Ky lajm është bërë me dije nga burime për “noa.al”.
Shkak për këtë është bërë diversioni i shkaktuar në Universitetet publike ku disa studentë kanë pranuar urdhrin e ministres së Shëndetësisë që vaksina të jetë me detyrim për të ndjekur mësimin në auditore dhe disa e cilësojnë si të paligjshme dhe antikushtetuese.
Sipas këtyre burimeve, hapja e universiteve publike në vend është menduar që të shtyhet me të paktën 2 javë.
25 tetori është menduar si datë e re rihapjeje me shpresën se deri atëherë do të ketë më shumë studentë dhe pedagogë të vaksinuar.
Kujtojmë që Ministria e Shëndetësisë e bëri të detyrueshëm vaksinimin për studentët e arsimtarët, me synimin për t’u rikthyer në auditore për këtë vit akademik. Studentët duhet të dorëzojnë certifikatën e vaksinimit në fakultetet përkatëse, në mënyrë që të ndjekin normalisht mësimin.
Ndërkohë, rektori i Universitetit Bujqësor, Fatbardh Sallaku është shprehur se mund të shtyhet nisja e vitit akademik, në mënyrë që të vijohet me vaksinimin e studentëve.
Për Euronews, Sallaku tha se asnjë student nuk do të lejohet të futet në auditor dhe se pedagogu do të ketë listën e studentëve që mund të marrin pjesë fizikisht në mësim.
