Koronavirus nuk po kursen më as mjekët dhe as personelet e spitaleve, të cilët në jo pak raste kanë mbetur edhe viktima të virusit vdekje-prurës.
Rasti më i fundit dhe më shqetësues vjen nga QSUT-ja ku si pasojë e infektimit me koronavirus, ka dalë “jashtë loje” i gjithë Reparti i Hemodializës.
Pesë punonjës të Shërbimit të Hemodializës në Qendrën Spitalore “Nënë Tereza”, kanë rezultuar pozitiv me COVID-19.
Lajmi konfirmohet nga mjeku i njohur i këtij shërbimi, Ahmet Duraku, që thotë se prej 4 ditësh i është drejtuar Shefit të Shërbimit me një kërkesë për të nisur hetimin epidemiologjik, por që nuk ka marrë ende asnjë përgjigje.
Mjeku nuk e përjashton mundësinë që infeksioni të jetë përhapur nga stafi mjekësor tek pacientët, por për ta vërtetuar këtë duhet që të gjithë të shtruarit dhe bluzat e bardha, t’i nënshtrohen testit.
Në intervistën e dhënë prë ‘News 24’, doktor Duraku, i kujton qeverisë dhe Ministrisë së Shëndetësisë se, pikërisht një prej grupeve më të rrezikuara nga COVID-19, janë të sëmurët që trajtohen në Qendrën e Hemodializës.
Një maskë e thjeshtë kirurgjikale në fytyrën e doktorit është i vetmi mjet mbrojtës përballë virusit vrasës. Doktori apelon se, në asnjë rast pacientët nuk duhen të shtrohen në spital pa kryer më parë testin për COVID-19.
Në emër dhe të kolegëve të tij, doktor Ahmed Duraku, i kërkon qeverisë të investojë për të mbrojtur mjekët dhe infermierët, si dhe të lëvrojë pagën e luftës për të gjithë bluzat e bardha, pasi përballë përhapjes komunitare të virusit, i gjithë personeli shëndetësor ndodhet në vijën e parë të betejës.
Ndërkohë, në spitalin “COVID 2” mësohet se janë të paktën 2 mjekë të tjerë të diagnostikuar me koronavirus, të cilët ndodhen të karantinuar në shtëpi. Që prej shpalljes së pandemisë, virusi vrasës “sars cov 2”, i ka marrë jetën 8 punonjësve të shëndetësisë, mjekë dhe infermierë.
/GazetaReforma.com/
