Lidhja dhe martesa me një vajzë shqiptare, ka bërë që një nga aktorët më të ndjekur në Turqi, të shprehë më në fund edhe origjinën e tij shqiptare.
Në një intervistë për “Pasdite në Top Channel”, një nga aktorët më të famshëm turq, Tolgahan Sayisman, tregoi për herë të parë në një televizion shqiptar historinë e tij të dashurisë.
“Kishim miq të përbashkët dhe merrnim pjesë në evente të ndryshme, kështu jemi njohur. Për Almedën e dija që nuk ishte në asnjë lidhje, pasi e di që kishte një garë se kush do të fitojë zemrën e Almedës, thashë edhe unë jam në këtë garë dhe jam shumë i lumtur që kam pranë vetes një vajzë si Almeda të cilën e dua shumë”, thotë Tolgahan.
Ndërkohë duke qeshur Almeda tregon për “garën” që bëhej në Turqi “unë e dija për garën, por bëja sikur nuk e dija. Unë i kisha vendosur qëllim vetes që do të merresha vetem me karrierën time dhe nuk do të krijoja lidhje dashurie. Por kur e pash Tolgahan për herë të parë më pëlqeu ”, tregon Almeda. E nëse ishte dashuri me shikim të parë, të dy thonë që jo. Por si e priti familja e Tolgahan lidhjen e tij me një vajzë shqiptare?
“Kur isha me xhirime në Shkup të Maqedonisë dëgjova një fjalë të urtë për shqiptarët ‘të marrësh një vajzë shqiptare është si të këpusësh një lule nga parajsa’. Më bëri shumë përshtypje dhe isha shumë kurioz të njihja një vajzë shqiptare. Jam shumë i lumtur që pata fatin të marr më të bukurën e Shqipërisë të cilën e dua shumë. Babai im me origjinë të largët është shqiptar”, tregon aktori i njohur.
Kurorëzimin e kësaj dashurie Almeda dhe Tolgahan vendosën ta bëjnë në hotelin më të mirë në Los Angeles, aty ku është xhiruar dhe filmi “Pretty Woman”.
“Kisha disa arsye pse zgjodha Los Angeles. Nga shtëpia që kam atje kam shkëmbyer mesazhet e para me Almedën. Atje kemi kaluar pushimet e para si çift, kështu që atje zgjodhëm të bëjmë edhe dasmën”, tregon Tolgahan.
“Kishim ftuar njerëzit tanë më të afërt. Nuk kishim shumë njerëz, por ishin ata që donim të kishim pranë në këtë ditë. Unë i thashë Tollgës që dua diçka të thjeshtë dhe u surprizova kur më tha dasma do të bëhej në hotelin më të mirë në Los Angeles, “Beverly Wilshire”, thotë Almeda.
