Thonë që të kundërtat tërhiqen, por dy anë të ndryshme të një medaljeje e bëjnë atë me vlerë, kështu që harrojeni çfarë thonë!
Sot do të hymë në atë botën e adoleshentëve modernë, lidhjeve, puthjes së parë, dramat familjare, dhe botën e krimit, që ndërthuren bashkë për të na argëtuar në serialin e ri që kemi zgjedhur për këtë javë!
https://www.instagram.com/p/BdgAT3TlA6h/
Bazuar në seritë komike me të njëjtin titull nga Charles Forsman, “The end of the F *** ing World” i NETFLIX, ka në qendër dy personazhe të ndryshme në karakter, James (Alex Lawther) i cili është një djalosh i heshtur, por me mendime prej psikopati që ulërasin dhe Alyssa që luhet nga Jessica Barden, vajza që nuk qëndron 1 sekondë pa folur dhe pa thënë “f*ck” dhe “sh*t”.
James mendon se është një psikopat, pasi që i vogël e ka trajnuar veten të mos ndjejë gjë! As dashuri, as trishtim, asnjë gjë nuk ndikon tek ai, që pas vdekjes së të ëmës, përveç qëllimit që i ka vënë vetes, të vrasë dikë!
Bota e tyre ndërthuret kur Alyssa bën hapin e parë dhe prezantohet me James duke i thënë se e ka parë me skateboard dhe i ka pëlqyer shumë (në fakt e gënjen). Ajo shkon si me porosi te James, i cili ishte në kërkim të dikujt për ta vrarë, për të plotësuar listën e tij të gjatë të viktimave nga insektet te kafshët.
Pra qëllimi i James është të vrasë Alyssa-n, qëllimi i Alyssa-s, të kalojë kohën me James dhe të largohet nga familja e saj, njerku pedofil dhe e ëma që mbyll njërin sy.
Një histori moderne e Bonnie dhe Clyde, por që të shkrin gazit!
E gjithë historia është aq e shkëlqyer saqë të mban mbërthyer! Do ta vrasë apo jo James Alyssa-n?! Kur ai mendon se është momenti i duhur për t’i ngulur asaj thikën që i ka dhuruar babai për ditëlindje (po, dhuratë), diçka e papritur ndodh! Për shembull Alyssa do që të bëjnë seks!
Ajo e merr gjithnjë guximin për t’i kërkuar atij diçka, një puthje për shembull, ose një udhëtim që do t’ju ndryshojë jetën të dyve përgjithmonë, dhe do t’i kthejë në dyshen moderne Bonnie dhe Clyde!
Alyssa kërkon të takojë babanë e saj të cilin nuk e ka parë prej vitesh, por çdo ditëlindje merr letra urimi prej tij! James merr makinën e të atit dhe të dy nisen për udhëtim! Tragjedi të mëdha do të ndodhin rrugës që do të vënë në sprovë karakterin e tyre, atë që ata mendojnë se janë dhe ndjejnë!
Humori i zi, tipik anglez!
James ka një obsesion gjithnjë e më të madh, vdekjen dhe beson se dëshiron të vrasë një person. Që pasi e ëma e tij u vetëvra, ai i ka bllokuar të gjitha emocionet.
Ai vret një mace në moshën 15 vjeçare, dhe më vonë bën edhe 30 vrasje të tjera kafshësh në rreth dy vjet. E megjithatë gjatë historisë, prirja e tij për të vrarë venitet ndërsa muret e tij emocionale që ka ndërtuar bien.
Përplasja e sjelljes psikopatike të tij me atë të një adoleshenti do të krijojë mjaft momente humoristike që do t’ju shkrijnë gazit.
Seriali trajton temat e pafajësisë, empatisë, shëndetit mendor dhe vetëvrasjes, brenda një kohë të shkurtër. Dy sezone me 8 episode secili që nuk i kalojnë asnjëherë 22 minutat, arrijnë të përcjellin thelbin dhe t’ju bëjnë dëshironi më shumë.
Muzika e përkryer!
Me gjithë romancën e përgjakshme dhe aspektet e dhunshme të serialit, kolona zanore e tij e ndërthurur me rryma të ndryshme është thjesht perfekte. Nga “Laughing on the Outside” e Bernadette Carroll te hiti i Julie London “The End of the World,” çdo këngë është e integruar në mënyrë të përsosur me secilën skenë.
Kur duam të nisim një serial të ri sigurohemi të jetë i bukur dhe i shkurtër, të mos ketë sezone të tjera në vijim, dhe ky është i tillë! Ka kaq shumë arsye mbresëlënëse për të parë “The end of the F****ing World”, saqë ia vlen ta nisni menjëherë!
/Iconstyle.al
