Pas reshjeve të shiut që shkaktuan përmbytje në shumë qytete, kjo javë ka sjellë në vendin tonë temperatura shumë të ulëta dhe reshjet e para të dëborës. Sipas meteorologëve, acari me temperatura që arrijnë deri në -14 gradë celsius do të jetë prezent në vendin tonë deri në mesin e javës së ardhshme.
Meteorologu Hakil Osmani, në një intervistë për “ABC News” ka treguar se ky i ftohtë ka ardhur si pasojë e ndikimit të stuhisë “Filomena” duke sjellë temperatura që vlerësohen deri në 10 gradë më të ulëta se normalja. Kjo situatë ka sjellë prezencë akulli dhe ngrice pothuajse në të gjithë vendin.
“Këto temperatura nuk janë normale pasi stuhia “Filomena” ka sjellë vlera shumë më të ulëta në territorin shqiptar. Në Ultësirën Perëndimore kemi vlera negative gjatë orëve të mbrëmjes dhe mëngjesit në territorin shqiptar. Sa i përket të hënës pritet që këto vlera termike pritet të jenë prezente”, shprehet ai.
Përmirësimi i motit pritet vetëm pas të mërkurës, teksa parashikohet se prej të enjtes do të rikthehen reshjet dhe temperaturat do të rriten.
“Duke qenë se kemi tërheqje të masave ajrore të acarta që i kemi përjetuar gjatë stuhisë “Filomena”, kemi ardhjen e masave të ngrohta nga Mesdheu duke bërë që të kemi edhe reshje.
