A e keni menduar ndonjëherë se përveç pamjes së jashtme, do të ndryshoni edhe në karakterin tuaj? Vitet nuk lënë gjurmë vetëm fizikisht, por edhe në personalitetin e secilit prej nesh.
Në moshën 77-vjeçare do të kemi ndryshuar totalisht nga ai tip që kemi qenë në rini. Nëse do të takoni një shokun tuaj të klasës do të lodheshit duke u përpjekur për ta njohur.
Sipas studiuesve, jo vetëm për rrudhat, flokët e bardhë, por tiparet tona të personalitetit ndryshojnë rrënjësisht nga adoleshenca.
Një studim që ka analizuar personalitetin e qindra pjesëmarrësve në një distancë prej 63 vjetësh, e ka vërtetuar një gjë të tillë. Qelizat e trupit janë zëvendësuar vazhdimisht dhe në të njëjtën mënyrë edhe karakteri ka ndryshuar rrënjësisht gjatë kësaj periudhe të gjatë.
Zbulimi duket se kundërshtoi studimet e mëparshme, që kishin dalë në konkluzionin se ka një farë qëndrueshmërie të caktuar në personalitetin e gjithsecilit. Sipas “Mirror”, studimi i mëparshëm ishte bërë në periudha të shkurtra, për shembull: nga fëmijëria në moshën e mesme dhe nga mosha e mesme në pleqëri.
Studimi nisi nga një hulumtim i kryer në vitin 1950 tek 1208 skocezë 14-vjeçarë. Mësuesit e tyre në atë kohë ishin të ftuar për të vlerësuar personalitetin e nxënësve duke përdorur gjashtë parametra: vetë-besimin, këmbënguljen, stabilitetin e humorit, ndërgjegjen, origjinalitetin dhe dëshirën për të mësuar. Të gjitha së bashku, këto tipare kanë kontribuar në zhvillimin e një vlerësimi që përcakton termat e “besueshmërisë”.
Sipas studimit në një distancë prej më shumë se 60 vjetësh, kërkuesit arritën të gjenin 635 prej nxënësve që ishin në testim në vitin 1950. Nga këta vetëm 174 pranuan që të përsërisnin testin.
Këtë herë ishin të afërmit dhe miqtë që vlerësuan personat që iu nënshtruan testit. Ata nuk gjetën asgjë të përafërt me karakterin e testuesve kur ata ishin 14 vjeç. Me pak fjalë, ishte shumë e vështirë që të njihje vullnetarët duke lexuar të dhënat e 63 viteve më parë. Ata kishin ndryshuar rrënjësisht!
Burimi: Mirror
