Deri më tani nuk ka asnjë rast të një personi të prekur me Koronavirus në Shqipëri. Ministrja e Shëndetësisë, Ogerta Manasterliu tha sot në një konferencë për shtyp se rasti i audios që qarkulloi dje në Whatsapp ku një vajzë fliste për 12 raste të infektuarish në vendin tonë, është fals.
“Ju kemi informuar për rastet e mundshme, ku 6 raste që janë analizuar nga ISHP kanë rezultuar negative”, theksoi ministrja.
“Jemi të përgjegjshëm dhe duhet të ecim me transparencë maksimale me publikun, për të gjitha masat që jemi duke ndërmarrë. Komunikimin me publikun e kemi thelbësor për të shmangur çdo dezinformim. Edhe dje jo pak mesazhe kanë qarkulluar që kanë nxitur panik. Nuk është koha që paniku t’i zë vendin arsyes. Është koha të vlerësojmë dhe dëgjojmë ekspertët, që në Shqipëri nuk mungojnë, të cilët po ndjekin planin e veprimit të miratuar nga tas-forca dhe strukturat në qeverinë shqiptare. Dua t’iu ftoj si media për t’iu pasur bashkëpunëtorë ashtu si dhe qytetarë, në një situatë që nuk kërkon panik, por përgjegjësi, transparencë dhe racionalitet. Jemi përballur dje me mesazhe të rreme, të cilat menjëherë kemi informuar nëpërmjet Ministrisë për jo vërtetësinë e tyre”, tha ministrja e Shëndetësisë.
Por a do të mbyllen kufinjtë me Italinë tani që janë raportuar mbi 200 raste me Koronavirus dhe 4 viktima në vendin fqinj në vetëm dy ditë?
“Masat që do të marrim do të jenë orientuar nga qëllimi madhor për të mbrojtur shëndetin e qytetarëve”, tha Manastirliu, e cila shtoi se çdo vendim do të merret sipas shkallës së riskut:
“OBSH rekomandon të vlerësohet mundësia hap pas hapi bazuar në shkallën e riskut, por mbyllja e kufijve realizohet kur paraqiten raste, kur kemi situatë të epidemisë me përhapje të gjerë, kur edhe në këto raste nuk vendosen masa agresive kombëtare, por izolohet lokalisht rasti gjurmohet kontakti dhe vendosen masa”.
“Do të përgjigjemi sipas situatës dhe shkallës së riskut. Vendimet do të merren hap pas hapi me qëllim mbrojtjen e qytetarëve shqiptarë”, theksoi ministrja e Shëndetësisë.
Po ashtu, të njëjtin qëndrim dhe përgjigje ministrja dha edhe përballë pyetjes nëse duhen mbyllur shkollat. Sipas saj, nuk është momenti.
