Si një avokate e zonja, Amal Clooney e di shumë rëndësinë e përgatitjes. Ajo dhe bashkëshorti George kanë zgjedhur tashmë spitalin ku ajo do të lindë binjakët e saj në Londër, një vajzë dhe një djalë, zbulon një burim i “Us Weekly”. Ky i fundit shtoi se ata kanë dhe një plan rezervë, pasi kanë zgjedhur edhe spitalin në Nju-Jork në rast se janë duke udhëtuar.
Aktori 55-vjeçar dhe avokatja e të drejtave të njeriut 39-vjeçare kanë ndarë edhe një nga nëntë dhomat e tyre të gjumit, për ta kthyer në dhomën e fëmijëve. Çifti, i cili është martuar në shtator të 2014-s, nuk e ka dekoruar akoma dhomën. “Nuk duan që të sjellin ters”, thotë burimi.
Si një masë paraprake, Amal nuk po e mundon shumë veten dhe ka nisur të lejë disa çështje. Pas lindjes, në ndihmë do t’i vijë nëna e saj Baria Alamuddin, pasi ata nuk duan të marrin dado.
Ndërkohë nëna e aktorit, Nina Clooney, 78 vjeç, e intervistuar kohët e fundit nga revista amerikane “US Weekly”, tregon gëzimin e saj si gjyshe e ardhshme.
“Ne jemi jashtëzakonisht të lumtur për George dhe Amal dhe nuk mund të imagjinoj dot dy persona të jenë prindër më të mirë. Mendoj se ai do të jetë i jashtëzakonshëm dhe se ajo do të jetë një super mama”, thekson mamaja e aktorit.
Burimi: Us Weekly
