Një aksident i rëndë rrugor është shënuar në rrugën dytësore Lezhë–Kakarriq, ku një automjet ka dalë nga rruga dhe ka rënë në një kanal, duke u përmbysur. Si pasojë e aksidentit kanë humbur jetën babë e bijë, Anton dhe Bora Keçi. Sipas burimeve paraprake, dyshohet se ngjarja ka ndodhur që në orët e pasdites se djeshme, por është konstatuar vetëm në orët e vona të mbrëmjes të së shtunës.
Viktimat ishin punonjës të kampit të refugjatëve në Gjadër.
Djali, i shqetësuar që s’po arrinte t’i kontaktonte, ka telefonuar policinë. Ndërkohë, gjatë një patrullimi në zonë, policia ka konstatuar automjetin e përmbysur në kanalin me ujë, në fshatin Gocaj, në afërsi të fabrikës së çimentos, ku janë gjetur edhe trupat e pajetë të viktimave. Pas nxjerrjes së automjetit nga uji, u konstatua se trupat i përkisnin babait 52-vjeçar dhe vajzës, 20 vjeçe. Kjo e fundit drejtonte automjetin dhe dyshohet të ketë humbur kontrollin.
Në një postim ngushëllimi të shpërndarë nga Drejtoria e Burgjeve, bëhet me dije se 52-vjeçari ishte shef i Shëndetësisë në burgun e Lezhës, ndërsa e bija 20-vjeçare po ndiqte gjurmët e tij në Mjekësi pasi ishte studente në vitin e dytë të fakultetit.
Anton Keçi ka shërbyer për 6 vite në sistemin penitenciar, thuhet në reagimin e Drejtorisë.
“Me dhimbje të thellë njoftojmë se më datë 25.04.2026, në orët e mbrëmjes, në aksin rrugor Lezhë–Gjadër, në vendin e quajtur Gocaj, si pasojë e një aksidenti tragjik ku automjeti ka dalë nga rruga, kanë humbur jetën Dr. Anton Keçi, 52 vjeç, Shef i Shëndetësisë në IEVP Lezhë, si dhe vajza e tij 20-vjeçare, studente në vitin e dytë në Fakultetin e Mjekësisë.
Dr. Keçi shërbeu me përkushtim për rreth 6 vite në sistemin penitenciar, duke lënë pas vlerësim profesional dhe njerëzor tek kolegët dhe të gjithë ata që e njohën.
Në këto momente të rënda, shprehim ngushëllimet më të sinqerta për familjen, kolegët dhe të afërmit. Jemi pranë bashkëshortes dhe djalit të tij, duke ndarë dhimbjen e madhe për këtë humbje të parakohshme dhe të pazëvendësueshme”, thuhet në postim.
