Një statujë gjigante prej 21 metrash e Lionel Messi në Indi pritet të zhvendoset nga vendi ku ndodhet aktualisht, pasi autoritetet konstatuan probleme serioze me stabilitetin e saj për shkak të erërave të forta. Statuja monumentale e yllit argjentinas ishte ngritur në Kolkata në dhjetor të vitit të kaluar, gjatë turneut të Messit në Indi, duke u kthyer menjëherë në një atraksion të madh për tifozët e futbollit dhe turistët.
Megjithatë, pas muajsh ekspozimi në kushte atmosferike, banorët vendas raportuan se struktura kishte filluar të lëkundej nga era, duke ngritur shqetësime për sigurinë publike. Pas këtyre ankesave, inxhinierë nga Departamenti i Punëve Publike kryen një inspektim të detajuar të statujës.
Sipas raportimeve të mediave ndërkombëtare, ekspertët zbuluan se integriteti strukturor i monumentit ishte kompromentuar, çka çoi në urdhrin për heqjen dhe zhvendosjen e menjëhershme të saj.
Statuja është ndërtuar me fibër qelqi dhe hekur, ndërsa aktualisht mbahet e stabilizuar përmes litarëve të fortë prej najloni për të shmangur rrezikun e rrëzimit. Për arsye sigurie, autoritetet kanë vendosur gjithashtu barriera rreth saj për të mbajtur larg kalimtarët dhe automjetet.
Sipas BBC News, autoritetet po shqyrtojnë tashmë disa vende alternative ku mund të transferohet monumenti i famshëm. Ndërtimi i statujës kishte zgjatur 27 ditë dhe ishte realizuar nga një ekip prej 45 personash.
Megjithatë, zhvendosja e saj pritet të jetë një operacion kompleks. Afërsia me një rrugë shumë të ngarkuar dhe një stacion metroje e bën procesin mjaft të vështirë, ndërsa autoritetet lokale kanë deklaruar se “është më e lehtë të thuhet sesa të realizohet në praktikë”.
Një detaj interesant është se vetë Messi kishte marrë pjesë virtualisht në ceremoninë e inaugurimit të statujës. Futbollisti u shfaq në një ekran gjigant dhe simbolikisht shtypi një buton në telekomandë për të zbuluar monumentin para mijëra tifozëve entuziastë.
