Një operacion emergjent është zhvilluar gjatë natës në ujërat pranë Durrësit, pasi Kapiteneria e Portit të Durrësit mori një thirrje urgjente për ndihmë nga kroçera “Marbella Explorer II”, e cila ndodhej rreth 20 milje larg portit.
Sipas informacioneve zyrtare, sinjali i alarmit është dhënë rreth orës 23:50, kur në bordin e kroçerës ndodhej një shtetas anglez i cili kishte shfaqur simptoma të rënda shëndetësore dhe kishte nevojë për ndërhyrje të menjëhershme mjekësore.
Kroçera, e cila po lundronte në itinerarin Korfuzi – Kotor, është udhëzuar menjëherë nga Kapiteneria e Portit të Durrësit që të afrohej në radë, në mënyrë që të bëhej e mundur ndërhyrja e ekipeve të emergjencës dhe evakuimi i të sëmurit.
Paralelisht me këtë manovër, janë vënë në lëvizje autoritetet përkatëse dhe strukturat e emergjencës. Në operacion u përfshi edhe rimorkiatori “Joni” i ASHD-së, i cili bëri të mundur transportimin e shtetasit anglez nga kroçera drejt portit, ku më pas ai u shoqërua me ambulancë drejt Spitalit Rajonal të Durrësit për trajtim të specializuar.
Rreth orës 02:30 të mëngjesit, shtetasi anglez me inicialet C.P. mbërriti në spital nën kujdesin e ekipit mjekësor. Burime zyrtare bëjnë me dije se ai ndodhet jashtë rrezikut për jetën, ndërsa po vijon të marrë trajtimin e nevojshëm.
Në këtë operacion shpëtimi u angazhuan disa struktura, përfshirë rimorkiatorin “Joni” me ekuipazhin përkatës, FSPD, Policinë Kufitare, oficerët portualë si dhe Kapiteni i Portit të Durrësit, të cilët bashkëpunuan për të realizuar me sukses ndërhyrjen emergjente në det.
