Ndërsa gara hapësinore midis Kinës, Rusisë dhe Shteteve të Bashkuara (SHBA) intensifikohet, miliarderët amerikanë po hyjnë në një garë të tyren dhe po konkurrojnë për të marrë kontrata fitimprurëse me NASA-n. Administrata Kombëtare e Aeronautikës dhe Hapësirës (NASA) ka lidhur kontratë me Blue Origin të Jeff Bezos dhe SpaceX të Elon Musk për të zhvilluar anije për ulje në hënë, ndërsa agjencia hapësinore përgatitet të dërgojë njerëzit përsëri në hënë deri në vitin 2030.
Ndërtimi i një anijeje kozmike për uljen në hënë për misionin e ardhshëm Artemis III i ka vënë kompanitë e dy miliarderëve përballë në garën hapësinore me rreziqe të larta. Agjencia amerikane hapësinore ka njoftuar gjithashtu ndryshime në afatin kohor të misionit Artemis. Artemis III nuk do të jetë një mision uljeje në hënë siç ishte planifikuar më parë, por përkundrazi do të jetë një provë në orbitën e ulët të Tokës e teknologjisë së uljes së NASA-s.
Misioni Artemis IV, i planifikuar për vitin 2028, do t’i çojë njerëzit në hënë.
SpaceX fillimisht ishte kontraktuar për t’i siguruar NASA-s Sistemin e Uljes Njerëzore Starship; megjithatë, pas ndryshimeve të lidershipit në agjenci dhe vonesave nga kompania e teknologjisë hapësinore e Musk, NASA vendosi të ftojë ofertues të tjerë në tetor të vitit të kaluar.
Edhe anijen Blue Origin të Bezos u kontraktua dhe tani agjencia hapësinore thotë se të dy anijet kozmike mund të përfshihen në misionin Artemis III, i cili do të praktikojë ankorimin e kapsulës së ekuipazhit Orion. Do të zgjidhet kompania që do të dorëzojë një pajisje uljeje të gatshme para misionit të planifikuar Artemis III në vitin 2027.
SpaceX fitoi kontratën për të ndërtuar anijen kozmike Starship, e aftë të mbajë 100 anëtarë të ekuipazhit dhe 200 ton ngarkesë, me vlerë 2.89 miliardë dollarë. Nga ana tjetër, NASA i pagoi Blue Origin një shumë fikse prej 3.4 miliardë dollarësh për të ndërtuar një anije uljeje të ngjashme me atë të përdorur në misionin Apollo rreth 50 vjet më parë.
SpaceX pati një avantazh në fillim, por mbetet për t’u parë se cila kompani do ta shohë anijen e saj të uljes që do t’i çojë njerëzit përsëri në hënë.
