Një ngjarje e rëndë ka tronditur New York City-n, ku të paktën tre persona mbetën të plagosur pas një sulmi me hanxhar në Stacionin Grand Central, një nga nyjet më të mëdha të transportit publik në qytet.
Sipas mediave amerikane, mes tyre New York Post, dy burra dhe një grua u sulmuan nga një person i armatosur me hanxhar në platformën e metrosë që shërben linjat 4, 5 dhe 6 në drejtim verior. Ngjarja ndodhi pak pas orës 9:30 të mëngjesit sipas orës lokale, në një moment kur stacioni ishte i mbushur me udhëtarë.
Paniku përfshiu menjëherë zonën, ndërsa dëshmitarë okularë raportuan për skena kaotike dhe njerëz që përpiqeshin të largoheshin me shpejtësi nga vendi i ngjarjes. Forcat e policisë mbërritën në vendngjarje pas një thirrjeje emergjente dhe ndërhynë menjëherë për të neutralizuar autorin.
Sipas burimeve policore të cituara nga mediat, efektivët hapën zjarr ndaj sulmuesit, i cili mbeti i vdekur në vend. Ende nuk janë bërë publike identiteti apo motivet e mundshme të këtij sulmi.
Të tre personat e plagosur janë transportuar në spital dhe ndodhen jashtë rrezikut për jetën, ndërsa edhe dy oficerë policie iu nënshtruan kontrolleve mjekësore si masë paraprake.
Pas incidentit, Departamenti i Policisë së New York-ut u bëri thirrje qytetarëve përmes një njoftimi në rrjetin social X që të shmangin zonën e Grand Central, pasi hetimet janë ende në vijim. Për shkak të situatës, trenat në të dy drejtimet u devijuan përkohësisht, duke shkaktuar ndërprerje në qarkullimin e zakonshëm.
Guvernatorja e shtetit të New York-ut, Kathy Hochul, reagoi menjëherë pas ngjarjes, duke e cilësuar sulmin si një “akt të pakuptimtë dhune” dhe duke theksuar rëndësinë e sigurisë publike në hapësirat e transportit.
Autoritetet vijojnë hetimet për të zbardhur plotësisht rrethanat e kësaj ngjarjeje, ndërsa qyteti mbetet i tronditur nga një tjetër incident i dhunshëm në një nga pikat më të frekuentuara të tij.
