Një ngjarje e rëndë ka tronditur Brazilin, pasi një turist humbi jetën në mënyrë tragjike teksa përpiqej të realizonte një fotografi pranë një ujëvare.
Viktima është identifikuar si Caio Libero Batistela, me profesion kontabilist. Ngjarja ndodhi në shtetin e Paraná, një zonë e njohur për peizazhet natyrore dhe ujëvarat piktoreske që tërheqin turistë vendas dhe të huaj.
Sipas mediave lokale, Batistela ndodhej në majë të ujëvarës Rio Sao Jorge, kur iu afrua buzës për të bërë një foto. Në ato momente ai dyshohet se ka humbur ekuilibrin, duke rënë nga një lartësi prej rreth 40 metrash.
Raportohet se një person që ishte me të ka tentuar ta kapte nga rrobat për ta ndalur rënien, por përpjekja rezultoi e pasuksesshme. Sipas zjarrfikësve, edhe ai rrezikoi seriozisht të binte në humnerë gjatë përpjekjes për ta ndihmuar.
Ekipet e emergjencës u përballën me vështirësi të mëdha për shkak të terrenit të thyer dhe aksesit të kufizuar në zonë. Ujëvara ku ndodhi aksidenti konsiderohet e vështirë për t’u arritur, çka e komplikoi edhe më shumë operacionin për nxjerrjen e trupit.
Ngjarja ka rikthyer edhe njëherë në vëmendje rrezikun që paraqesin zonat natyrore, sidomos kur vizitorët i afrohen pikave të rrezikshme për të realizuar fotografi. Autoritetet lokale u bëjnë thirrje turistëve të tregojnë kujdes maksimal dhe të respektojnë masat e sigurisë gjatë eksplorimit të zonave të tilla.
