Vizita e superyllit të futbollit Cristiano Ronaldo në Shtëpinë e Bardhë duket se e ka lumturuar Barron Trump, djalin e vogel, 19-vjeçar të Presidentit amerikan Donald Trump. Gjatë një darke me personalitete saudite, Trump u tha të ftuarve:
“Djali im është një fans i madh i Ronaldos. Dhe Barron pati mundësinë ta takonte, dhe mendoj se tani më respekton pak më shumë, vetëm nga fakti që ua prezantova.”- tha Trump.
Ronaldo, i cili tani eshte 40 vjeç, luan për klubin saudit Al-Nassr. Rekordmeni i paraqitjeve dhe golave me Portugalinë synon të luajë edhe në Kupën e Botës së ardhshme, e cila do të mbahet vitin e ardhshëm në Shtetet e Bashkuara, Kanada dhe Meksikë.
Në darkën e organizuar në Uashington, Ronaldo ishte pjesë e eskortës së princit të kurorës së Arabisë Saudite, Mohammed bin Salman.
Kupa e Botës 2034 do të zhvillohet në Arabinë Saudite. Vendi është shpesh i akuzuar nga kritikët për “sportswashing”, përdorimin e sportit për të larguar vëmendjen nga shkeljet e të drejtave të njeriut.
Më herët, Trump mbrojti princin saudit gjatë vizitës së tij të parë në Uashington që nga viti 2018, kur vrasja e gazetarit Jamal Khashoggi e vendosi trashëgimtarin e fronit nën një lupë të ashpër ndërkombëtare.
