Kanceri i gjirit mbetet diagnoza më e shpeshtë e kancerit në Shqipëri, duke përbërë rreth 11% të rasteve të reja çdo vit dhe duke përfaqësuar rrezikun më të madh për gratë. Sipas të dhënave nga Instituti i Shëndetit Publik (ISHP), aktualisht në vend jetojnë rreth 5,000 gra të diagnostikuara me këtë sëmundje. Vetëm në vitin 2024 janë raportuar 805 raste të reja tek gratë dhe 14 tek meshkujt.
Një shqetësim i rëndësishëm është rritja e incidencës së kancerit të gjirit, e cila është përshkallëzuar me 23% krahasuar me vitin 2015. Rritja është më e dukshme tek gratë mbi 50 vjeç, me një shtim prej 3.6% çdo vit, ndërsa tek gratë nën 50 vjeç është vërejtur një ulje mesatare prej 1.9%. Mosha mesatare e diagnostikimit është rritur nga 55 në 59 vjeç, duke reflektuar një tendencë për paraqitje më të vonshme të sëmundjes.
Një zhvillim pozitiv është përmirësimi i mbulimit me depistim. Numri i mamografive është rritur ndjeshëm, duke kaluar nga 5,000 në vitin 2014 në mbi 25,000 gjatë periudhës 2022–2024. Aktualisht, rreth 25% e grave të grupmoshës target përfitojnë nga programi i depistimit falas. Mamografitë e lëvizshme identifikojnë çdo vit mbi 10 raste të dyshuara, ndërsa kontrolli i rregullt zbulojnë 50 raste të tjera në faza të hershme.
Specialistët theksojnë rëndësinë e depistimit të hershëm, pasi kjo rrit ndjeshëm shanset për trajtim të suksesshëm dhe shërim të plotë. Zbulimi në kohë mbetet arma më e fortë kundër kancerit të gjirit.
