Një zjarr i përmasave të mëdha ka rënë pasditen e së hënës në zonën e njohur si Qafa e Butrintit, duke përfshirë një pjesë të gjelbëruar të Parkut Kombëtar.
Flakët janë përhapur me shpejtësi për shkak të erës së fortë që fryn në zonë, çka ka rritur ndjeshëm rrezikun që ato të depërtojnë më thellë në park dhe të dëmtojnë sipërfaqe edhe më të gjera të tij. Ky territor është i mbrojtur dhe njihet për biodiversitetin e pasur, ndaj çdo zjarr paraqet një kërcënim serioz për florën dhe faunën që e karakterizon.
Forcat zjarrfikëse janë në terren dhe po punojnë me intensitet për të vënë nën kontroll flakët. Megjithatë, terreni i vështirë dhe përmasat e mëdha të zjarrit po e bëjnë situatën më të komplikuar. Nga pamjet e siguruara duket qartë se tymi dhe flakët janë të dukshme nga larg, duke alarmuar banorët dhe vizitorët e zonës.
Ende nuk dihet shkaku i rënies së zjarrit, ndërsa autoritetet kanë nisur hetimet për të zbuluar nëse bëhet fjalë për një shkëndijë aksidentale apo për zjarrvënie të qëllimshme. Institucionet përkatëse kanë bërë thirrje që qytetarët të shmangin lëvizjet pranë zonës së prekur për të mos rrezikuar jetën e tyre dhe për të mos penguar operacionin e shuarjes së flakëve.
