Presidenti francez Emmanuel Macron ka ngritur zërin për njohjen ndërkombëtare të një prej krenarive kulturore franceze: muzikës elektronike “French Touch”. Në një intervistë për radion Fréquence Gaie, ai kërkoi që kjo rrymë legjendare të shpallet trashëgimi kulturore jomateriale nga UNESCO.
“Pasuri kombëtare që duhet të ruhet”
Macron e cilësoi “French Touch” si një identitet muzikor unik, që ka bërë historinë dhe meriton të njihet zyrtarisht si pjesë e trashëgimisë botërore. “Është një pasuri kombëtare që duhet ta mbrojmë me krenari,” tha ai, duke shtuar me humor:
“Allons enfants de la French Touch, le jour de gloire est arrivé!- një lojë fjalësh që rimendon himnin kombëtar në frymën e muzikës dance.
Çfarë është “French Touch”?
Ky stil i muzikës elektronike lindi në Francë në vitet ’90 dhe u bë një valë globale. Artistë si Daft Punk, Cassius, Dimitri From Paris, Air, SebastiAn dhe shumë të tjerë sollën një tingull të rafinuar, emocional dhe melodik, ndryshe nga teknot e ashpra që dominonin në Berlin.
Një thumb për Gjermaninë: “Nuk kemi pse të marrim mësime”
Macron nuk i kurseu komentet ndaj statusit që UNESCO i dha muzikës elektronike të Berlinit në vitin 2023.
“E dua Gjermaninë, jam europian. Por s’kemi pse marrim mësime nga askush. Ne e shpikëm muzikën elektro!”, deklaroi presidenti me ton krenar.
Nga klubet e Parisit në UNESCO?
Kjo nuk është hera e parë që Macron angazhohet për mbrojtjen e trashëgimisë muzikore: më herët ka promovuar përfshirjen e muzikës gwoka nga Guadeloupe dhe maloya nga La Réunion në UNESCO. Tani synimi është që edhe “French Touch” të renditet krah rrymave si reggae-ja xhamajkane.
Emërtimi “French Touch” lindi në vitet ’80 në klubin “Le Palace” në Paris, dhe përfshin një gamë të gjerë stilesh, nga tingujt e butë të Air, te jazz-i elektronik i St. Germain e deri te hitet botërore të Bob Sinclar dhe David Guetta.
