Një valë e re proteste ka goditur Eurovision-in, pak ditë para fillimit të festivalit më të madh muzikor në Evropë. Më shumë se 70 artistë dhe muzikantë që dikur kanë përfaqësuar vendet e tyre në këtë kompeticion, i kanë dërguar një letër të hapur Unionit Evropian të Transmetuesve (EBU), ku kërkojnë përjashtimin e Izraelit dhe transmetuesit të tij publik, KAN, nga edicioni i këtij viti.
Arsyeja? Sipas tyre, pjesëmarrja e Izraelit në një platformë që promovon paqe dhe bashkim është e papranueshme, për sa kohë “vazhdon gjenocidi në Gaza dhe regjimi i aparteidit ndaj palestinezëve”.
Mes emrave që nënshkruajnë letrën janë edhe fitues si Salvador Sobral, Charlie McGettigan, si dhe këngëtarë të njohur si Mae Muller, La Zarra dhe Hadise. Ata e quajnë këtë edicion “më të politizuarin dhe më të pakëndshmin në historinë e Eurovision-it”.
Kjo lëvizje vjen në një kohë kur kritikat ndaj EBU-së janë shtuar, sidomos pas kujtesës që Rusia u përjashtua në vitin 2022 për pushtimin e Ukrainës, ndërsa Izraeli vijon të marrë pjesë, pavarësisht konfliktit brutal në Gaza.
Në letër theksohet se: “EBU nuk mund të pretendojë neutralitet ndërsa zbardh krime lufte dhe u jep zë regjimeve që shtypin popuj të tërë.” Ndërkohë, një peticion paralel me mbi 56 mijë firma kërkon të njëjtën gjë: Izraeli jashtë Eurovision-it.
EBU, nga ana tjetër, vazhdon të mbajë qëndrimin e saj: Eurovision-i është një ngjarje që promovon përfshirje dhe diversitet, dhe pjesëmarrja e vendeve anëtare nuk ndikohet nga zhvillimet politike.
Festivali këtë vit do të zhvillohet nën hije të polemikave dhe tensioneve, me shumë sy të drejtuar nga qëndrimi që EBU do të mbajë ndaj thirrjeve gjithnjë e më të forta për përjashtim.
