Roja bregdetare greke ka shkaktuar vdekjen e dhjetëra emigrantëve në Mesdhe gjatë një periudhe trevjeçare. Kjo deklaratë është dhënë nga dëshmitarë për BBC.
Ata deklarojnë se emigrantët u hodhën qëllimisht në ujë. BBC raporton se të paktën 40 persona kanë humbur jetën nga një akt i tillë, fakt që është kundërshtuar nga roja bregdetare greke. Qeveria greke është akuzuar prej kohësh për kthime të detyruara, duke i shtyrë njerëzit drejt Turqisë, gjë që është e paligjshme sipas ligjit ndërkombëtar.
15 incidentet që u analizuan, të datës maj 2020-23, rezultuan në 43 vdekje. Në pesë nga incidentet, emigrantët thanë se u hodhën direkt në det nga autoritetet greke.
Një nga rrëfimet më rrëqethëse u dha nga një burrë nga Kameruni, i cili thotë se u ndoq nga autoritetet greke pasi zbarkoi në ishullin Samos në shtator 2021. Ai tha se po planifikonte të regjistrohej në tokën greke si azilkërkues.
“Ne mezi ishim ankoruar dhe policia erdhi nga pas”, na tha ai. “Ishin dy policë të veshur me të zeza, dhe tre të tjerë me rroba civile. Ata ishin të maskuar, i shihje vetëm sytë. Ata filluan me [tjetrin] kamerunian. E hodhën në ujë”
Një tjetër tha se rojet e kanë rrahur.
“Më binin në kokë. Ishte sikur po godisnin një kafshë.”
Avokatët e të mbijetuarve kërkojnë që autoritetet greke të hapin një çështje gjyqësore.
Kujtojmë se në vitin 2023 u hodhën dyshime se rojet bregdetare greke kishin gisht në mbytjen e anijes së emigrantëve, në të cilën dyshohet se kanë vdekur qindra. Sipas analizave, anija e mbipopulluar e peshkimit nuk po lëvizte për të paktën shtatë orë para se të përmbysej.
Rojet bregdetare pretendojnë ende se gjatë këtyre orëve skafi ishte në një kurs për në Itali dhe nuk kishte nevojë për shpëtim.
Zyrtarët grekë janë shprehur se ata në bord thanë se nuk donin ndihmë dhe nuk ishin në rrezik deri pak para se anija e tyre të fundosej.
