Një ditë më parë, gjatë vizitës së kryeministres së Italisë në Gjadër të Lezhës, ndodhi një incident. Deputeti i opozitës italiane, Riccardo Maggi nga partia “Piu Europa” u përplas me kryeministren duke e akuzuar atë se po bën fushatë elektorale.
“Po bën fushatë elektorale, takime elektorale”,– tha deputeti Maggi, i cili ishte ‘protestuesi’ i vetëm që doli kundër ardhjes së Melonit, ndryshe nga shqiptarët të cilët nuk u mblodhën e nuk protestuan për kampin që po ngrihet në Gjadër.
Sipas deputetit, Meloni dhe kryeministri Edi Rama bënë viktimat për gati një orë, gjatë konferencës së përbashkët të tyre, ndërsa vazhdon më tej duke fajësuar badigardët e saj se po e dhunojnë teksa shton se këto veprime tregojnë se sa të pasigurtë janë emigrantët që do të vijnë në këtë kamp.
“Bëtë viktimat për një orë pa iu përgjigjur asnjë pyetje sesi do të funksionojë kjo qendër. Ju po bëni fushatë. Badigardët tuaj s’po më lejojnë e po më dhunojnë. Nëse kjo i ndodh një deputeti, imagjinoni se çfarë mund t’i ndodhë një emigranti”,– i tha deputeti – Melonit.
Kujtojmë se Kryeministrja e Italisë, Georgia Meloni ishte dje në një vizitë të përbashkët me kryeministrin Edi Rama në kampin e refugjatëve në Gjadër, si dhe në atë që do të përdoret për pritjen e tyre, në Shëngjin.
Pjesë nga debati mes kryeministres italiane Meloni dhe deputetit Maggi:
Maggi: Keni bërë viktimat për rreth një orë, pa shpjeguar si do funksiononte kjo qendër!
Meloni: Ju lutem largohuni (i drejtohet Gardës).
Maggi: Ju po bëni fushatë. Badigardët tuaj s’po më lejojnë e po më dhunojnë. Nëse i ndodh kjo një deputeti para kamerave, mund të imagjinoni çfarë do u ndodhë personave të shkretë që do jenë të mbyllur këtu brenda.
Meloni: Është një legjislacion europian dhe italian që ne kemi sjellë këtu, por ju nuk donit ‘Piu Europa’? Ne kemi sjell legjislacionin europian këtu.
Maggi: T’ju vij turp…
Meloni: T’ju vij turp juve…(Kthehet sërish për t’u sqaruar). Unë ju kuptoj.
Maggi: Po shpenzoni 1 miliardë dollarë për të bërë një hotspot elektoral. Hiqni kapelën e kandidates dhe vendos atë të Presidentes së Këshillit.
