Tatuazhet janë lidhur me një lloj kanceri vdekjeprurës të gjakut.
Studiuesit nga Universiteti Lund në Suedi zbuluan se individët që kanë bërë tatuazh kishin një rrezik 21 për qind më të lartë të limfomës, krahasuar me njerëzit pa tatuazhe. Limfoma është një lloj kanceri që prek qelizat e bardha të gjakut, të cilat janë thelbësore për luftimin e infeksioneve.
Lidhja mendohet të jetë me kimikatet kancerogjene në bojën e tatuazhit. Kur injektohet në lëkurë, interpretohet si diçka e huaj dhe sistemi imunitar aktivizohet, duke shkaktuar një inflamacion të shkallës së ulët në trup që mund të shkaktojë kancer.
Rreth 46 përqind e amerikanëve 30 deri në 49 vjeç kanë të paktën një tatuazh, ndërsa 22 përqind e të gjitha moshave, mesatarisht, kanë më shumë se një tatuazh.
Studiuesit identifikuan njerëz me limfomë të moshës 20 deri në 60 vjeç duke përdorur regjistrat e popullsisë, dhe më pas i përputhën ata me një grup kontrolli të së njëjtës gjini dhe moshë, por pa diagnozë të limfomës. Më pas pjesëmarrësve iu dha një pyetësor në lidhje me faktorët e stilit të jetesës për të parë nëse ishin bërë tatuazhe apo jo.
Pyetësorit iu përgjigjën rreth 1,400 persona me limfomë, si dhe 4,193 persona në grupin e kontrollit. Në grupin me limfomë, 21 për qind (289 persona) ishin bërë tatuazhe, ndërsa 18 për qind (735 persona) në grupin e kontrollit.
“Pasi morëm parasysh faktorë të tjerë të rëndësishëm, si duhanpirja dhe mosha, zbuluam se rreziku i zhvillimit të limfomës ishte 21 për qind më i lartë tek ata që ishin bërë tatuazhe”, tha Christel Nielsen, studiuesja që drejtoi studimin.
Studiuesit kishin teorizuar se madhësia e tatuazhit mund të ndikojë në rrezikun e limfomës dhe menduan se një tatuazh i plotë i trupit mund të lidhet me një shans më të lartë për kancer.
