Europa po përballet me një valë të pazakontë të të nxehtit që ka përfshirë një pjesë të madhe të kontinentit, duke sjellë temperatura rekord dhe pasoja tragjike në disa vende. Që prej fundjavës, termometrat kanë shënuar nivele tipike të mesit të verës, ndërsa autoritetet dhe ekspertët e klimës kanë ngritur alarmin për rrezikun në rritje nga fenomenet ekstreme.
Sipas raportimeve, të paktën 11 persona kanë humbur jetën në Francë dhe Britaninë e Madhe si pasojë e incidenteve të lidhura me temperaturat e larta. Në Britani, katër persona humbën jetën pasi hynë në ujë për t’u freskuar, ndërsa vendi regjistroi temperaturën më të lartë ndonjëherë për muajin maj, me 35.1 gradë Celsius.
Situatë shqetësuese paraqitet edhe në Francë, ku shtatë viktima janë raportuar gjatë ditëve të fundit. Ndërkohë, në Spanjë temperaturat kanë arritur deri në 37 gradë në Sevilje, ndërsa meteorologët paralajmërojnë se në jugperëndim të vendit termometri mund të prekë së shpejti 40 gradët.
Edhe Italia ndodhet në gatishmëri, me autoritetet që kanë ndërmarrë masa të posaçme për mbrojtjen e të moshuarve dhe personave me probleme shëndetësore.
Ekspertët shpjegojnë se vala e të nxehtit po shkaktohet nga një masë ajri shumë e nxehtë që vjen nga Afrika e Veriut. Sipas tyre, episode të tilla pritet të bëhen gjithnjë e më të shpeshta si pasojë e ndryshimeve klimatike dhe ngrohjes globale.
