Në garën e Maratonës së Bostonit, pjesmarrës ishte një burrë nga Massachusetts, i cili garën ia kushtoi tre fëmijëve të tij, të cilët u vranë vitin e kaluar.
Patrick Clancy vrapoi ditën e hënën në garën 26.2 milje, ndërsa mbante të shkruar emrat e fëmijëve të tij, Cora, Dawson dhe Callan. Po ashtu, ai kishte veshur një send që i përkiste secilit fëmijë: Një hark flokësh nga Cora 5-vjeçare, një rrip dore të Dawson 3-vjeçar dhe një byzylyk të Callan-it 7-muajsh.
“Ata ishin motivimi im,” tha Clancy në një intervistë me WCVB-TV pas garës.
Gruaja e Clancy dhe nëna e tre fëmijëve të tyre, Lindsay Clancy, po përballet me akuza për vrasje dhe sulm në lidhje me vdekjen e fëmijëve. Në ditën e incidentit, 24 janar 2023, policia mori një telefonatë pas orës 18:00 nga një burrë i cili tha se gruaja e tij kishte tentuar të vetëvritet duke u hedhur nga dritarja e shtëpisë së tyre.
Më pas, Policia gjeti tre fëmijë të vegjël, një vajzë 5-vjeçare, një djalë 3-vjeçar dhe një djalë 7-muajsh, brenda në shtëpi, të pajetë, raportojnë mediat e huaja.
Patrick Clancy, i cili fitoi vëmendjen kombëtare pas vdekjes së fëmijëve të tij, tha se ndihej i mbështetur nga të gjithë gjatë gjithë rrjedhës së Maratonës së Bostonit.
