Rasti skandaloz në redaksinë tonë: Dy qytetarët kërcënojnë gazetarët dhe mediat, mashtrojnë me karta false dhe dëmtojnë bizneset
Kërcënime, ofendime, shantazh, përndjekje dhe krim kibernetik- Të gjitha akuzat që rëndojnë mbi individët me inicialet L.A. dhe R.L., të cilët u denoncuan nga qytetarët për shkeljet dhe mashtrimet me bizneset e tyre, në grupin e denoncimeve në Telegram “QYTETARËT”.
Që prej dhjetorit që lamë pas, për të zhdukur të gjitha gjurmët e mashtrimeve e vjedhjeve të tij në bizneset e paregjistruara në tatime, “Qershizat Shop”, “Fashion Online 01” dhe “Auto Luani”, qytetari L.A. nisi kërcënimet ndaj medias “Iconstyle” dhe gazetarëve të saj.
Duke menduar se me shantazhet e para ia hodhi drejtësisë dhe kaloi “pa u lagur”, një tjetër denoncim mbërriti sërish një javë më parë pranë redaksisë tonë, për një tjetër mashtrim të një tjetër biznesi të po këtij individi.
Gjithçka u pasqyrua në “Iconstyle” dhe tek “Qytetarët”, por avazi i pronarëve filloi sërish, duke shkaktuar shqetësim të madh tek stafi i medias dhe punonjësit e kompanisë.
Prej një jave, L.A. dhe R.L. kanë kërcënuar në mënyrë të vazhdueshme me mesazhe dhe telefonata punonjësit e redaksisë, kanë shantazhuar duke tentuar të pengojnë punën e medias dhe kanë publikuar të dhënat tona personale në grupet pornografike në Telegram.
Për të dëmtuar edhe më tej kompaninë, L.A. dhe R.L. kanë falsifikuar identitetin e tyre, duke përdorur edhe karta bankare false, për të penguar gjithashtu një prej bizneseve të kompanisë, duke shkaktuar rreth 40,000 euro dëm ekonomik, nëpërmjet krimit kibernetik.
Në çdo deklaratë të tyren, dy pronarët shfaqin besimin se drejtësia shqiptare nuk ekziston, se ndaj tyre s’do të merret asnjë masë ndëshkuese dhe se s’ka asgjë që mund t’i ndalojë në këto aktivitete.
Ju vëmë në dijeni se çdo material është dokumentuar dhe çështja do të ndiqet penalisht, për të ndaluar çdo kërcënim skandaloz, shantazh, përndjekje, dëmtim biznesi e krim kibernetik, që tenton të cënojë dinjitetin, punën dhe jetën private të secilit prej nesh!
I bëjmë thirrje secilit prej jush të mos ngurrojë të denoncojë të gjitha rastet në hapësirën e dedikuar denoncimeve, QYTETARËT. Një rikujtesë që askush s’mund të na bëjë të heshtim me kërcënime!
Vijon…
