Një fenomen i jashtëzakonshëm ka ndodhur në Islandë, ku vetëm gjatë një nate kanë rënë 800 tërmete, të cilat kanë shkaktuar panik për shpërthime vullkanike.
Si pasojë, autoriteti i Mbrojtjes Civile shpalli gjendjen e jashtëzakonshme.
Si masë paraprake të enjten, ‘Laguna Blu’, një zonë turistike pranë Grindavikut, e njohur për llixhat e saj termale, u mbyll. Planet e evakuimit janë vënë në zbatim për qytetin e Grindavik, me popullsi rreth 4,000 banorësh, tre kilometra në jug-perëndim të zonës ku u regjistruan lëkundjet sizmike të premten.
Islanda ka 33 sisteme vullkanike aktive, numri më i lartë në Evropë dhe mijëra lëkundje janë regjistruar që nga fundi i tetorit.
Ndërkohë mbrëmjen e së premtes dy tërmete, ku më i forti ishte me magnitudë 5.2 të shkallës Rihter, u ndjenë deri në kryeqytetin Reykjavik dhe përgjatë një pjese të madhe të bregdetit jugor të vendit.
“Në këtë fazë, nuk është e mundur të përcaktohet saktësisht se kur dhe ku magma mund të arrijë në sipërfaqe. Ka të dhëna se një sasi e konsiderueshme magmë po lëviz në veri drejt Grindavíkut”, thuhet në një deklaratë.
Rreth 24,000 lëkundje janë regjistruar në gadishull që nga fundi i tetorit, 800 prej të cilave vetëm gjatë 24 orëve të fundit.
